Congress thupui ber remna - R Lalzirliana

MPCC vice president R Lalzirliana chuan nimin khan Congress Bhavan-ah thu sawiin, "Congress thupui ber chu remna neih a ni," a ti.

Zira chuan, PwD comissioner atana B Sairengpuii hun pawhseina order sût a ni chu tlâwmnaa an ngai loh thu sawiin, "Huaisen takin ro kan rel ang a, a ṭul hunah tlâwm ngam a ngai. Dik nia inhriat ringawt a, mi dang ngaihtuah loh chuan ro a rel rei theih loh," a ti a; democracy rama awm nih inhriat a ṭul thu a sawi.

MSU-te duh dan tihhlawhtlin a nih chhan sawiin Zira chuan, "Kan fate pawh an duh zawng a tìra kan tihsak phal loh pawh an ngen an ngen chuan kan tihhlawhtlinsak ṭhin. Tunah pawh kan naute duh hi an dinhmun enin, hmangaihna avangin kan tihsak a ngai a ni," a ti.

MPCC Vice President chuan inremna tluka hlu a awm lo tih sawiin, "Inremna kan duh avangin vawiin ni kan thleng. Tlâwm nun chan zawk huam a, huaisenna rilru neia kan hotute an awm hi a lawmawm hle," a ti a; Congress thupui ber chu remna a ni tih hre nawn fo turin a chah.