Rotluangliana'n Union Minister a hmu

Tourism minister John Rotluangliana chuan nimin Union minister of state for Tourism Dr Mahesh Sharma chu a pisaah a kâwm a, eco-tourism chungchang a sawipui.

Sorkar thuchhuah tarlan danin, John Rotluangliana hian sorkar laipuiin 'Swadesh Darshan' hnuaia cheng vbc. 94.91 man 'New Eco Tourism Projects 2015-2016 Thenzawl and South Zote' a pawm avang leh sum a pek chhuah avangin Union Minister hi lawmthu a hrilh a ni.

John Rotluangliana chuan, project zawh a nih hunah chuan ram chhung leh ram pawn aṭangin khualzin tam tak hîp lut tura rin a nih thu a sawi a, "Ṭhalai lehkhathiam hna nei lote tan hna a siam dawn bakah, a bul hnaia cheng mipuite tan eizawnna ṭha tak a siam ngei beisei a ni," a ti.

Mizo ṭhalaite'n Eco Adventure Tourism an tuipui dan te, Ṭhalfavang Kût 2014 leh 2015-a recreation flying, demonstration & joy ride an hlut dante a sawi a; Aizawl Eco Adventure Tourism Circuit atana pawisa an dil mek chu pek theih ni se a duh thu a hrilh bawk.