Estimates Committee-in KMMTTP tlawh Chak zawka hnathawh dan tur an enfiah

Mizoram Assembly hnuaia Estimates Committee-te chuan, Ningani khan Kaladan Multimodal Transit Transport Project (KMMTTP) kawngpui sial hna thawh mekte tlawhin, chak zawka hna thawh a nih theih dan tur an enfiah.

Estimates Committee chairman Lalrinliana Sailo chuan, Myanmar chhung lama he project-a hnathawh chinte ena an kal thu sawiin, “Sittwe port (jetty/lawng kailawn) te, chuta ṭanga Chhimtuipui lui zawh chho zela kawngpuiin a va chhun tur Paletwa port-te kan tlawh a, hna thawktu Essar company-te’n kum hnih chhunga zawh ngei an intiam a ni,” a ti.

Lalrinliana Sailo sawi danin, Myanmar ram chhunga Paletwa aṭanga Zorinpui (ramri) thleng kawngpui laitu tur chu tender chhuah mek a ni a; kawng laih hi harsa tak tur a ni hmel loh avangin kum hnih vel chhungin an zawh thei beisei a ni.

Kawngpui bakah hmalak tur a la tam tih sawiin Lalrinliana Sailo chuan, “Kawngpui siam zawhah hian land custom station te, integrated check point te, truck/bus terminal leh thil dang tam tak Zorinpui hmuna buatsaih tur a la awm a, Myanmar ram chhunga an zawh fel hnuah kan la buai rei lutuk ang tih a hlauhawm a ni,” a ti.

Revised estimate ang chuan, Mizoram chhungah kawngpui km. 90.82 laih tur a ni a, tunah hian overall physical progress chu 62.20% a ni.

KMMTTP enfiahnaah hian Estimates Committee member pahnih, Vanlalawmpuii Chawngthu leh R Vanlalvena-te an kal a, member dang chu harsatna avangin an kal thei lo. Committee hi PWD hotute leh Lawngtlai district hotute’n an ṭawiawm a ni.