ASI Circle Centre atan Aizawl thlang

Archaeological Survey of India (ASI), Guwahati Circle chu ṭhenin, ASI Aizawl Circle din thar a ni. Aizawl Circle hian Mizoram bakah, Tripura leh Manipur state-te a huam ang.

INTACH, Mizoram Chapter convener P Rohmingthanga hnen aṭanga thu dawn danin, ASI Aizawl Circle din a nih thu hi January 20, 2016 khan sorkar laipuia Ministry of Culture-in a pawmpui hnuah, ASI director general Dr Rakesh Tiwari chuan a tichhuak. Tuna ASI Guwahati Circle-a superintending archaeologist Dr MK Chauley chu ASI Aizawl Circle-ah superitending archaeologist a ni ang.

P Rohmingthanga chuan, ASI, Guwahati Circle-in a huam zau lutuka an hriat avang leh, archaeological heritage site-te hmuh chhuah leh humhalh hna chak zawka thawh a nih theih nan June 2015 khan Ministry of Culture Secretary hnenah ASI Guwahati Circle
ṭhen turin rawtna an thlen a, Aizawl chu circle headquaters atana dah turin an rawt nghal niin a sawi.

INTACH Mizoram Chapter rawtna Ministry of Culture-in a pawm chu lawmawm an tih thu sawiin, Rohmingthanga chuan, "INTACH Mizoram Chapter leh sorkarin pipute sûlhnû humhim nan chak lehzuala hma an lak kan beisei a, Aizawl Circle chhunga state dang pahnihte pawhin chak zawka hma an lak theih ngei kan beisei," a ti.