Champhai college-ah CBCS workshop buatsaih

Champhai College-a Research Consultancy & Evaluation Committee chuan nimin khan an seminar hall-ah ni khat awh state level workshop on Choice Based Credit System (CBCS) an buatsaih.

Workshop-ah hian resource person, Mizoram University-a associate professor Dr Lalbiakdiki Hnamte chuan, CBCSchu zirna tihṭhatna tura ruahmanna siam a nih thu a sawi a, "CBCS hnuaiah hian zirlaite'n an zirnaah tih tur tam zawk an nei ang a, zirtirtu mawhphurhna pawh a sang zel dawn a ni," a ti.

Worshop-a tarlan dan-in, CBCS hi khawvel university-te kalphung a ni a, India ramah chuan university changtlung zawkte'n an hman hnuah, UGC-in national programme anga puangin, university hrang hrangin an hmang tawh a, Mizoram University pawhin a kalpui ṭan mek a ni.

MZU hnuaia affiliated college-te chuan session thar aṭangin CBCS hi an hmang ṭan dawn a; CBCS-ah chuan science subject la pawhin a duh chuan elective-ah arts subject a la thei tawh dawn a ni.