Mizoramah BSNL mobile subscriber 1,52,762

BSNL chief general manager (NEI Circle) KK Saxena chuan, nimin khan Aizawl Press Club-ah thuthar thehdarhtute kâwmin, Mizoramah BSNL-in telephone landline connection hman mek 18,795 leh mobile phone z̄ 1,52,762 an neih mek thu a sawi.

KK Saxena chuan Mizorama BSNL din-hmun sawiin, telephone ex-change (wire) 65, BTSS (WLL) 41, BTSS (GSM) 204 leh broad-band con-nection hman mek 9,223 an neih thu leh, EVDO 844 leh Wimax 136 an neih mek thu a sawi a ni.

Hetih lai hian, kum kal mek 2015-16 chhungin landline phone connection 1,100, broad-band connection 1,050, mobile phone connection thar 33,200 nei tura an inruahman thu a sawi a, "Aizawla mobile phone tower 39-te chu khawl thara thlak a ni a, hman-raw hrang hrangte a thara thlak a ni bawk," a ti.

KK Saxena sawi danin, Mizoramah lease line an kalpui mek a; lease line an pek tawhte chu - Mizoram sorkarin SWAN a kalpuinaah te, Mizoram police-in CCTNS an kalpuinaah te, bank hrang hrang te, Postal department, zirna in hrang hrang, Assam Rifles leh BSF-teleh, mimal sumdawng
ṭhenkhatte an ni.

BSNL Chief General Manager chuan, an subcriber-te hamṭhatna tur thil thar chi hrang hrang an duan chhuah thu sawiin, "India ram hmun dang ang bawkin Mizoramah pawh BSNL landline-ah zan dar 9 aṭanga a tuk zing dar 7 thleng man chawi loin mi biak (call) theih a ni a, BSNL landline
aṭangin landline bakah, mobile phone service leh network eng pawh man chawi lohin biak theih a ni," a ti.

KK Saxena chuan, landline bakah, mobile phone leh internet broadband-ahte sub-scriber-te hamṭhatna tur hrang hrang siam thar a nih thu a sawi bawk.