KHAWTHLIR

National Voters Day

Vawiin January 25 hi National Voters Day a ni a, India ram hmun hrang hrangah hman a ni dawn. Mizoramah pawh Aizawl bakah district headquarters hrang hrang-ah hman a ni dawn a; Aizawlah chuan Vanapa Hall-ah chawhma dar 11 aṭang-in Governor Lt.Gen. Nir-bhay Sharma hoin hman a ni ang. Mizoram sorkar chuan thuchhuah siamin, Vo-ters Day hmannaah hian gazetted officer chin chu tel vek turin a hriattir.

KTP Conference

Kristian Ṭhalai Pawl (KṬP)-te chuan January 22, 2016 aṭang khan pastor bial hrang hrangah Bial Conference an hmang a, nizan khan a ṭiak. KṬP Bial Conference-ah hian Inrinni khan nilengin rorel inkhawm an nei a, bial chhung thil leh ram pum huap thilte an rel a ni.

Thang tichhia

Ngur Branch YMA chuan tun hnai khan YMA kumpuan 'Ram leh hnam humhalh' tih bawhzuina atan an khaw rama Myanmar mite'n thang an kamte an tichhia a, thang 30 an man. Ngur Branch YMA chuan an ram chhunga nungchate an humhalh thu leh Myanmar mite'n thang an kam chu an duh loh thu an sawi.

Games meichher

February 5 -16, 2016 chhunga Guwahati leh Shillong khawpuia neih tur, ‘12th South Asian Games’ meichher chuan vawiin hian Aizawl a rawn lut dawn. Meichher hi January26, zing dar 6:30 ah Chanmari kawn aṭanga Treasury Square inkarah tlanpui a ni dawn a, tlanbikten an tlanpui dawn a ni.

Phone hrui chhia

New Secretariat Complex, Khatla kawngah tunlai hian pipe phum a ni a, hei hian telephone hrui a tichhe nual a, hei vang hian Bungkawn, Shivaji Tillah leh Secretariat Complex-ah phone a chhia a, BSNL lama thawktute'n siamthat hna an thawk mek. BSNL hotute mipuite hrethiam turin an ngen.

Truck-in chîl hlum

Nimin chhun dar 1 vel khan Vairengte-ah BSF driver Hav. Yashpal chu Silchar lam aṭanga lo chho truck MZ-01 G-7029 chuan a chil a, a hmunah a thi. Sipai ruang hi nimin vek khan Silchar lamah phurh thlak a ni.