Serchhipa Education Complex tur Chief Minister-in lungphùm a phúm

Chief minister Lal Thanhawla chuan Inrinni khan Serchhip AOC Venga Educational Complex sakna tur lungphùm a phúm. Educational Complex hi cheng nuai 122 sênga sak tur a ni.

Lung phûm zawha Serchhip Town Hall-a inkhawmah thu sawiin Chief Minister chuan, "Mizo hnam zia, milpui leh tunlai boruak mil bawk sia zirna kalpui a nih a, eizawnna tlak thiamna bik nei zirlai chher chhuah an nih theih nan Education Reforms Commission (ERC) din a ni a, an rawtnate chu Mizorama kan mithiamte'n uluk takin an zir a, kan hnam mil leh ṭhatpui dan ber tura ruahmanna an siam chhuah a ni," a ti.

Chief Minister sawi danin, ERC rawtna tihhlawhtlinna atan sum mamawh a tam tham avangin sorkar laipuiah thlen a ni a; sorkar laipuia sorkar a inthlak avang leh Planning Commission ṭhiah a nih avangin, ERC atana sum mamawhte NITI Aayog-ah thlen tura hmalak mek a ni.

Zirtirtute chu naupangte entawn tlak an nih a pawimawhzia hre thar tura chahin Lal Than-hawla chuan, "Zirlaibu piah lamah zirtirtute chu faina kawngah te, insûm theihna kawngah te, mimal nun hmasawnna kawngahte entawn tlaka an awm a ngai. Mizote hi thu leh hlaah kan sang em em a, chutih rualin, a bik takin tunlai hian kan ṭawngkam hman dan leh ziak danah a dik lo kan hmang nasa tawh," a ti a; ṭawng hman dan dik lo chu zirtirtute'n ve se a duh thu a sawi.

School Education minister H Rohluna pawhin thu sawiin, Education Complex satute nen an inkawm tawh thu a sawi a,
ṭha taka a rang thei ang bera sa zo turin chah.

Serchhipa Educational Complex sakna tur hi Special Central Assistance (2014-15) hnuaia hmuh niin, cheng nuai 122 sêngin chhâwng lia sak tur a ni a; kum hnih chhung sak tur niin, a sa tur hian Lushai Engineers thlan a ni.