Mipuiin lal chhungkaw induhsakna an hnâwl - MNF

MNF party chuan thuchhuah siamin, Persons with Disabilities (PwD) commissioner B Sairengpuii a hna aṭanga sorkarin a bàn ta chu lal chhungkaw induhsakna mipuiin an hnâwl vang niin an tarlang.

MNF chuan, B Sairengpuii bàn chungchanga Home minister R Lalzirliana'n, ‘Remna hi Congress thupui ber a ni. Local cable lamin, kha news an puan chuan thisen chhuahna a thlen phah ta a ni,’ tia a sawi chu thu dik tâwk lo a nih thu an sawi a; "Remna hi Congress thupui ni se chuan, thisen chhuaka zirlaite leh rualbanlote tawrhtir hmasa lo khan, lal chhungkaw induhsak bikna vanga B Sairengpuii order an tihchhuah hi an hnûkkîr (revoke) daih tawh zawk tur a ni," an ti.

MNF chuan, thisen chhhuahna a thlen chhan chu, pawisawi lo zirlaite mai ni lo, rualbanlote thil phût tihlawhtling tura kawngzawhte ep zawnga dimdawîna tel eih loa police talhfiak kengte'n kut an thlâk vang a nih thu sawiin, "A mawhphurtu lian ber chu Police department enkawltu Home Minister a ni," an ti a; zirlaite leh rualbanlote thisen chhuaka tawrhna thleng chu pawi an tih thu an sawi.

MPC ṭhalaite pawhin thuchhuah siamin, Mizoram sorkar chu PwD Commissioner thar a rang thei ang bera dah turin an phût tih an tarlang.