Congress sorkarah thubuai a tlahniam - Congress party

Congress party chuan thuchhuah siamin, MNF sorkar lai aiin Congress sorkarah sualna a tlahniam zawk niin an tarlang a; Mizoram mipui leh Home enkawltu minister R Lalzirliana hnenah lawmthu an sawi.

MPCC Communication department chuan, March 2015 aṭangin MLPC Act hman a ni a, phalna neite'n khauh taka vilna hnuaiah zu an zuar nia sawiin, "Kum 2015-ah hian hunpui vuakvetah boruak a nuam em em a, kum dang zawng aiin misual leh thil tisual an tlem a, police case ziah luh a tlahniam hle a ni," an ti.

MPCC-in Mizoram police record an tarlan danin, kum 2015 chhungin thubuai 2,516 ziah luh a nih laiin, kum 2014-ah thubuai ziah luh 2,852 a ni a; kum 2014 aiin kum 2015-ah thubuai ziah luh 309-in a tlem zawk a ni.

Congress party chuan, MNF party-in kum 10 (1999-2008) sorkarna an chelh chhunga kum tina thubuai ziah luh chawhrual chu 3647.1 a ni a; kum 2008-a Congress party-in sorkarna an chan aṭanga kum 2015 thlenga kum tina thubuai ziah luh chawhrual chu 2583.7 a nih thu an tarlang bawk.