Dr Lalrinawmi Ralte hnenah Zakapa Award, 2023 hlan

Social Welfare & Tribal Affairs dept.-in hmeichhiate venhim leh an dinhmun chawikan kawnga hnathawk ṭhate hnena hlan tura an butasaih 'Zakapa Award-2023' chu Dr Lalrinawmi Ralte, Tlangnuam hnenah nimin khan chief minister Zoramthanga'n a hlan.

Vanapa Hall-a Zakapa Award hlanna inkhawm hi Social Welfare & Tribal Affairs principal secretary KT Beicho-a'n a kaihruai a; khuallian CM Zoramthanga chuan, Zakapa Award buatsaih a ni chu ropui a tih thu a sawi a, "Mizo hmeichhiate chhan tura engkim chàn huamtu lal Zakapa hi Zofaten hrerengin, huaisen takin a hnung hi i zui ang u," a ti.

Zakapa khan dan lo angin bawrhsap kha a hnial tih sawiin Zoramthanga chuan, "Mah se, a ram leh a hnam a hmangaihna leh a hnam dan a dinpui ngamna khan hnathawh ropui tak a nei zui ta zawk a nih kha. Keini pawhin he hnam chhan tur hian theihtawp kan chhuah zel ang," a ti a, hnam thinlung nghet tak puin, hnama min dintu Pathian hre rengin an beih zel dawn thu a sawi.

Mizoram chhehvelah Zofate'n buaina an tawh thu sawiin Zoramthanga chuan, "Tunah hian kan chhehvela kan Zohnahthlak unauten chhanchhuah kan ngai e tiin min au mek a, Mizoram lam rawn hawiin an rawn pan khawm. Anni lo tuamhlawmin kohhran, tlawmngai pawl leh mi tin maiin theihtawp kan chhuah ho a ni," a ti.

Chief Minister hian Zakapa Award-2023 dawngtu Dr Lalrinawmi Ralte hnenah thuziak leh Rs 1,00,000 a hlan a ni.

Social Welfare & Tribal Affairs minister Lalrinawma pawhin thu sawiin, "Zakapa thih hnu kum 130-ah hmeichhiate humhimtu lal ropui a nih zia hriatrengna leh chawimawina kan nei hi a hlu ka ti a. Tlai tawh hle angin lang mah se a hnathawh ropui tak avang khan a hming hi Pathianin a bo pil a phal loa, tunah ropui takin a lo vul leh ta a ni," a ti.

Award dawngtu Dr Lalrinawmi Ralte hian Mizoram pawna Mizo hmeichhia harsatna tawkte chhanchhuahna hna vawi tam tak a lo thawk tawh ṭhin a ni.

Award hming put chhan Zakapa hi kum 1839-ah a piang a, Dokhama fapa pali zinga pathumna a ni. Khawri leh Sailulakah kum 20 chuang ve ve a lal hnuah December 28, 1914 khan kum 75 mi niin Sailulakah a thi.

Lal a nih laiin The South Lushai Hills District siam thara superin-tendent (bawrhsap) hmasa ber CS Murray (Marliana)-a'n nula mutpui tur a dil a, hei hi Zakapa hian lo hnialin, silaia kah a tum a ni.