Day of Sign Languages hman a ni

Vawiin hi International Day of Sign Languages a ni a, he ní pual hian nimin khan Gilead Special School (GSS), Bawngkawn Brigade-ah Spastic Society of Mizoram buatsaihin hun hman a ni. Kumin International Day of Sign Languages thupui chu 'Bengngawngte’n khawi hmunah pawh harsatna nei loa zaizira an duh zawngte an sawi theihna khawvel' tih a ni.

He hun hmanpuitu Governor Dr Hari Babu Kambhampati chuan, kut zaizira inbiakpawh theih chu thil pawimawh tak a nih thu a sawi a, "Beng ṭha lo leh ṭawng harsatte tan chauh a ni lo a, hnam hrang hrangte ṭawng inhriatsak lem lohte pawhin inbiakna atana an hman theih leh inpumkhatna atan hmanraw ṭha tak a ni," a ti.

Mizoramah kum 30 chuang hlawhtling taka Gilead Special School kalpui a ni chu ropui a tih thu sawiin Governor chuan, "He sikul pawimawh tak, vohbik naupangte puala zirna leh thiamthil kawhhmuhna hmun hian hma a sawn zel theih nan Governor ka nih anga ka tih theihte chu tih zel ka tum," a ti bawk.

Governor hian mipui inzirtirna tur leh vohbik naupang nu leh pate hnena thil ṭangkai tur inkawhhmuhna atan siam, Spastic Society of Mizoram instagram account leh youtube channel a tlangzarh nghal a ni.

International Day of Sign Languages puala inkhawm hi Spastic Society of Mizoram chairperson Chhingpuii'n a kaihruai a; Governor leh a nupuite chuan GSS-a classroom zawng zawng tlawh chhuakin, zirlai leh an zirtirtute an kawm nghal.