KHAWTHLIR

Minister-in hawng

Transport minister TJ Lalnuntluanga chuan nimin khan Champhai District Transport Office (DTO) building thar a hawng a; public transport-a chuang zinga nu nau chak lo zawkte chungah hleilenna a thlen lohna tur leh an lo him theihna turin lirtheiah 'panic button' dah a nih tur thu leh December 31, 2023 thleng a pung awm loin lirthei thi tawh tihnunna hun hawn mek a nih thu a sawi. Champhai DTO building thar hi cheng nuai 262 senga sak a ni a, a hawnna hunah hian Champhai North bialtu MLA Dr ZR Thiamsanga pawh a tel.

ZPM inkhawm

ZPM chuan nimin khan an pisa-ah political session an hmang a, ZPM vice president Dr Kenneth Chawngliana, PAC member R Zonunsanga leh general secretary BC Tawnate'n thu an sawi.

Faina hnatlang

Sainik School, Chhingchhip chuan nimin khan Swachhata Hi Seva Activities pualin Chhingchhip khuaah faina hnatlang, ‘Awareness Campaign on Cleanliness’ an nei a; cadet leh staff thlan bik-te'n Chhingchhip bazar leh a chhehvel an tifai a ni.

MPCC inkhawm

MPCC chuan nimin khan Congress Bhavan-ah political session an hmang a, thusawitu MPCC treasurer Dr Lalmalsawma chuan, "Vawiin ni a kan ram dinhmun hi ngaihtuah chian a ngai a, lal chhungkua leh an khawnbawlte tan lo chuan ṭah leh haṭhialna-ah a chang mek a ni. MNF sorkar hnuaiah record tamtak a chhe zawngin kan siam mek zel," a ti.

Minister chawimawi

North Kolasib Games & Sports Association chuan nimin khan Kolasib Hmarvengah Kolasib bialtu MLA K Lalrinliana, minister hnenah an veng tana thil a tihsak tawhte vangin chawimawina an hlan. K Lalrinliana chuan, veng hrang hrangah ṭhalai infiammite tan hmalak chhunzawm zel a tum thu a sawi.