MNF kan vote hian BJP kan ṭanpui - ZPM Leader

ZPM chuan September 21, Ningani khan Palak bial chhung khaw hnihah vantlang inkhawm an buatsaih a, thusawitu ZPM leader Lalduhoma chuan, "MNF kan vote hian kan sakhua ticheptu BJP kan ṭanpui," a ti.

Mizoramah eng inthlanah pawh - VC, LC, district council leh MLA-ah MNF vote hian kristian sakhua ticheptu BJP an ṭanpui nia sawiin ZPM Leader chuan, "An thâ kan tichak tihna a ni. Kan ram rorelnaah Pathian ram lo thlenna atana hnawk ber chu NDA hi a ni," a ti a, political party an nihna aṭang chauha thlir loin, Kristian nihna aṭangin eng pawl hi nge awmna tur leh awm lohna tur tih ngaihtuah a hun tawh thu a sawi.

Lalduhoma chuan India ram pumpuiah hnam tê nau te, Kristiante leh sakhaw tê zawkte an him theihna turin central inthlan lo awm turah BJP leh a sangawi zawnpuite an hneh phawt a ngai tih sawiin, "Mizoramah tualṭo party inti siin MNF-te chu BJP nen central-ah thawk hoin, Parliament-ah pawh an ṭhu tlang," a ti.

Mizoram rorelnaa Pathian ram a lo thlenna tura daltu lian ber pakhat chu eirukna a nih thu sawiin ZPM Leader chuan, "Hruaitu corrupt kan neih chuan engti kawng mahin hmasawnna hi a awm thei dawn lo. Ram hruaitu ṭhenkhat, term khatah a in leh lo ṭha tak tak an din a, an hausakna a let hnih let thumin a pung thur thur," a ti a, an eiru lai hi hmuh kher a ngai lo, an khawsak danin an eiru tih a lanchian tir thu a sawi.

ZPM Leader chuan an party -in Val Upa Council an neih thu sawiin, "Anni hi eirukna do tura mi ṭangkai tak an ni dawn. Eirute chu an zilh anga, party chhungah na takin action an la ṭhin dawn a ni. Mizoramah eirukna a hluar nachhan chu CM-in department ṭha ṭha, sum tamna apiang an chan zel vang a ni. ZPM CM chuan Works department a chang ve dawn loa, minister ho a enkawl ang a, chak lo deuh a dawm anga, VUC-te nen hauh ngai an hau dawn a ni," a ti.

Palak biala ZPM candidate K Robinson pawhin thu sawiin, "Kan hmalam huna kan ram lo hruai tawhtuten theihtawpin ram tan hna an lo thawk tawh a, ṭhalaite khawvel a ni tawh. Ram hruai tur pawh hian ṭhalaite kan ṭhanharh zel a pawimawh.ZPM chuan tunah hian in khawngaih vote kan dil che u," a ti a, sorkarna an chan chuan a lehpekah chuan an thil tih hmanga vote an dil tawh tur thu a sawi.

ZPM thuchhuah tarlan danin, inkhawmah hian ZPM Leader hian an party-ah mi 127 a lawmlut.