Police Sports Meet khar a ni

Mizoram Police Sports Meet vawi 21-na chu nimin khan Rajiv Gandhi Stadium, Mualpuiah khar a ni a; Home minister Lalchamliana'n hmanpuiin, hripui leng vanga sorkar sum dinhmun chhiat vangin recruitment tih hleihtheih a ni lo chu pawi a tih thu a sawi.

Lalchamliana chuan, infiamna hian taksa hriselna bakah police-te inkarah inunauna, inhmelhriatna ṭha, inlaichinna ṭha, inhriatthiamna leh thawhhona ṭha a awm theih nan a pawimawh thu a sawi a, "Hripui leng vanga sorkar sum dinhmun chhiat avangin recruitment tih hleihtheih a ni lo hi a pawi ka ti. Chuti chung chuan tuna Composonate ground-a lut mi engmaw zat police training centre-ah an training mek," a ti.

All India level-ah Mizoram Police chu infiamna hrang hrangah a langsar pawl anni chu a lawm thu sawiin Minister chuan, "71st BN Mullick Memorial Football championship Srinagar-ah pawh Mizoram Police team-te in champion thei hi ka chhuang takzet che u a ni," a ti a; mahni invawng ṭha a, discipline ṭha tak nei reng turin kalkhawmte a chah.

DGP Anil Shukla pawhin thu sawiin, police-te chu an hriselna leh an nun uluk taka enkawla, ruihtheihthil laka fihlim turin a chah a, "Mizoram Police hmel innih angin mahni inthununna ṭha tak nen Mizoram mipui venghimtu in ni tih hre reng ang che u," a ti bawk.

Mizoram Police Sports Meet 2023-ah hian police infiammi 1,107 an tel a; thupui chu 'Unity Through Sports' (Inpumkhatna tura infiamna) tih a ni.

Pakhat chu Central Range niin, pahnihna leh pathumna chu PHQ Group leh Red Group-te an ni.

Best athlete (men) chu havildar Lalhmangaihtluanga, 3r MAP niin, best athlete (women) chu RC/51 Lalrinawmi, Southern Range a ni.