Kan himna tur atan BJP thawhpui ngai lo tur Mizoramah Congress sorkar a ngai - Lalsawta

Lunglei Dist Congress Committee (LDCC) office-ah nimin khan chhung inkhawm buatsaih a ni a, thusawitu MPCC president Lalsawta chuan. Mizote himna tur atan Mizoramah Congress party an sorkar a ngaihthu a sawi.

Lalsawta chuan, tu leh fate hmalam hun thlirin vawiin aṭanga ṭan lak a ṭul thu sawiin, "Kan ram, kan hnam leh sakhua himna turin BJP thawhpui ngai lo tur Mizoramah Congress a sorkar a ngai. BJP hian pawisa leh thuneihna an hman nasat avangin an hlauhawm hle a, hmarchhak bikah chuan Mizoramah chiah hian an duh angin an che thei lo a, a chhan chu an mahni thawhpuitu MNF hian Mizo mipuite lakah BJP thawhpui anga lan an hreh vang a ni," a ti.

ZPM pawhin an sorkar chuan BJP thawhpui bak tih tur an nei lo tih sawiin MPCC President chuan, "Nakkuma sorkar laipui inthlan turah Congress kaihhruai an sorkar ngei dawn avangin Mizoramah pawh lungsi taka an thawhpui theih tur Congress kan sorkar tir a ngai," a ti a; BJP thawhpui ngai lo tur Congress party lamah mipuiten vote an pek a hun tâk thu a sawi.

Lalsawta chuan Mizoram ti danglam tur hian ramdang aṭangin tumah an lokal dawn lo tih sawiin, "Kan ṭhenawm Manipur rama hnam hnufual leh Kristiante chunga thil thlengte hian min ti harh sela, Mizorama a thlen ve lohna tura hma la thei leh danglamna siam thei ber chu Congress party kan nih avangin inthlanpui lo awm turah Congress a sorkar ngei theihna atan theihtawp kan chhuah a ngai," a ti.

MPCC President chuan sakhuanain ni tin nun, thil tih reng reng a thunun tel tih sawiin, "Chu chuan Vanramah min la hruai dawn a ni. Sakhuana hi sawi tet theih a ni lo. Kan sakhua avang hian min dotute chu kan sual hneh dawn leh dawn loh hre lo mahila, keini chuan huai takin kan sual zel dawn," a ti a, ding nghet tlata sualin, an tum ram an thlen ngei tur thu a sawi.

Tuna Mizoramin sorkar a hrawnah hian politicians khel fuh leh khel fuh lote inkar a hla tih sawiin, "Politics-ah hian ram dinchhuahna leh ram ṭhatna a awm a, chutiang tur chuan kan khel tur a ni. Politicians lak aṭanga hamṭhatna beisei vanga politics khelh hi a hrisel lo," a ti a, an party mipuite chu ram dinchhuahna atana politics khel turin a sawm.