Sikkim-a an hmalaknate zirchiang tura kalten hmun pawimawh hrang hrangte an tlawh

Champhai Forest Division-a Nature Learning Cenre (NLC) kalpui chhoh mek hnuaia hmalakna pakhat, Nature Learning Tour kaltlanga Sikkim State-a nungcha hrang hrangte enkawlna, humhalhna leh zirchianna hmunte bakah ram leilung hausakna humhalh kawnga hmalaknate zirchiang tura Sikkim-a cham mek Nature Learning Press Study Tour Team, Un-divided Champhai district chhunga MJA member pakuate leh IPR official-te chuan nimin khan hmun hrang hrang tlawhin an zirchiang.

Sikkim Himalayan Zoological Park, Bulbuley tlawhnaah hian Director Sangay G Bhutia leh DPi Shivani Pradhan te'n Nature Learning Press Study Tour-a kalte hi an lo dawng sawng. Himalayan Zoological Park chu kum 1997 a din, India rama sahuan zau berte zinga mi hectare 230 a zau, hmun sang taka awm a nih thu an sawi a, "Ramsa chi 17 leh Sava hrang hrangte enkawl mek an ni," an ti a, ramsa neih dan leh enkawl dante bakah Sikkim sorkara Forest department hmalak dan an hrilhfiah nghal.

GB Pant National Institute of Himalayan Environment & Sustainable Development, Sikkim Regional Centre, Pangthang an tlawhnaah scientist Dr Sandeep Rawat leh a thawhpuite'n an lo dawngsawng a, hmunhma acre 17 a zauah Himalayan tlang leh a chhehvela nungcha hrang hrangte lakkhawma zirchianna, humhalhna, tihpun leh sum chang thei tura hmalakna awmze nei taka kalpui a nih dante bakah leilung hausakna humhalh leh hman tangkai kawnga hmalaknate an hrilhfiah.

MJA member-te chuan Champhaia Nature Learning Centre kalpui chhoh mek a nih dante tarlangin, thawktute chu Champhai tlawha an tawnhriatte hmanga hmalak dun puiah an sawm a ni.

Hemi hnu hian Nature Learning Press Study Tour Team chuan kum 1984 a din square kilometre 51.76 a zau Fambonglho Wildlife Sanctuary an tlawh a, block officer N Lepcha leh a thawhpuite'n lo dawngsawngin hmalak dante an lo hrilhfiah a, inkawmhona hun hman zui a ni.