Sorkara tel ngei turin hma kan la dawn - MBJP President

Mizoram BJP chuan nimin khan an office-ah political session an hmang a, thusawitu MBJP president Vanlalhmuaka chuan sorkara tel ngei tura hma an lak dawn thu a sawi.

Vanlalhmuaka chuan, kumin kumtawpa MLA inthlan lo awm turah MBJP chuan a mala sorkarna an siam thei lo a nih pawhin, Mizorama mipui sorkar din a nih theih nan sorkar siamnaah tel ngei turin hma an la dawn tih sawiin, "Mizoram mipuiin sorkar ṭha hmel kan la hmu lo hi a pawi hle," a ti.

Mizoram chu state a nih hnuah Congress party leh MNF party te chiahin sorkarna an la siam tih sawiin MBJP President chuan, "Mipui beisei hmasawnna erawh an la thlen thei lo ve ve thung a ni," a ti a; an sor­kar chhungin minister-te leh an vua leh vangteah hma­sawnna a thlen nasat ṭhin thu a sawi.

Vanlalhmuaka chuan democracy sorkarin a tum chu Mizoram politician-ten an ṭhelh hle tih sawiin, "Chuvangin, mipui sorkar awmzia kan hriat theih nan Mizoramah BJP kan sorkar a ngai. Hmasawnna kan beisei phak baka ṭha zawk maha kalpui turin kan inbuatsaih a ni," a ti.

MBJP President chuan hmasawnna thlenna daltu eirukna an hnungkhirh dawn tih sawiin, " Sorkar chu mipui sorkar a nih ang ngeiin department zawng zawng pawhin tun aia nasa hian mipui tan an thawk thei dawn a ni," a ti a, chutiang ti ngam leh ti thei tur chu BJP-te an nih thu a sawi.