IPRO-te tan training buatsaih

State Election Commi­ssion hotute chuan nimin khan infor­mation & public relations officer (IPRO)-te tan IPR auditorium-ah kumina MLA inthlanpui awm tur pualin training an buatsaih a; inthlanpui tluang taka neih a nih theih nan media kaihhnawih thil hrang hrang an zirho.

Training hi deputy CEO Henry C Lalrawn­kima, State Training co-ordinator ni bawkin a kaihruai a; addl. chief electoral officer H Lianzela chuan, "Inthlan langtlang leh thianghlim tak neih a nih theih nan India ram danpui chuan Election Commission of India (ECI) chu zalenna leh thuneihna zau tak a pe a, ECI chuan media-te chu a khuahkhirh loa, amaherawhchu, dan leh thupek media-ten an zawm chungchang a ngai pawimawh a ni," a ti a; IPRO-te chu Systematic Voters’ Education and Electoral Participation (SVEEP) hmalaknate theihtawp chhuahpui turin a sawm.

Mipuite hrilhhriat leh ṭan bik nei loa thu thehdarh chu sorkar thupuangtute mawh­phurhna a nih thu sawiin H Lianzela chuan; vote tla a tam theih nan ṭan lak a ṭul thu te, MLA inthlanpui neih turah polling station 50%-a inthlan kalpui dan chu official-ten an lo enfiah theih nan ‘web-casting’ tih a ni dawn thu a sawi bawk.

He hunah hian district 11-a IPRO-te an tel a, state level master trainer Dorothy Muansangi, Victor Lalawmpuia leh Zoramdini ten inthlan kaihhnawih thupui hrang hrang an zirtir a ni.