National Service Scheme (NSS) Day hman a ni

National Service Scheme (NSS) Day vawi 54-na pualin nimin khan Chanmari YMA Hall-ah hun hman a ni a, minister of state Robert Romawia Royte-in hmanpuiin; midangte tana thisen peknaah te, faina vawn leh vantlang tana hnathawh kawngah ṭan la zel turin kalkhawmte a chah.

Robert Romawia Royte chuan, NSS volunteer leh Programme Officer (PO)-te chu thil ṭha tih kawngah ṭan la zel turin a chah a, "Zirlai leh ṭhalai tam tak, an ṭhatlai leh vanglai huna NSS volunteer nih vanga PO-te kaihhruaina hnuaia inhmang mekte hian thil ṭha an ti a ni," a ti a; hlawhtling tur leh dingchhuak turin hun hman thiam a pawimawh thu te leh ruihhlo lak fihlima a pawimawh thute a sawi.

NSS Day hi September 24 a ni a, kuminah Pathianni a nih avangin nimin khan hun hman a ni. He hunah hian khuallian hian Pachhunga University College, Hrangbana College, Aizawl College, Synod HSS, Zemabawk HSS leh Helen Lowry HSS-te hnenah Sports Minister's Trophy for Voluntary Blood Donation hlan a; NSS Annual Achievement Report 2022-2023 a tlangzarh nghal bawk.

NSS Day hi Mizoram puma NSS dinna zirna-in hrang hrangah hman niin, faina hnatlang leh thisen pek huaihawt a ni a; Mizoram pumah NSS Unit awmna sikul leh college 101 a awm a ni.