Loneitute tan Farmers' Helpline a ṭangkai

Agriculture department-in Covid-19 vanga inkhàrkhip chhunga loneitute'n an harsatna an thlen theihna tura Farmers' Helpline an siam chu loneitute'n an hmang ṭangkai thawkhat.

Farmers' Helpline hi April 3, 2020 khan Agriculture (Crop Husbandry) director Rohmingthanga Colney-in a hawng a, ni tin chawhma dar 10 aṭanga chawhnu dar 2 thleng hawn ṭhin a ni. Loneitute tan an inhawn reng thu an sawi a; harsatna neite chu helpline number 2311160 leh 232856-ahte be ṭhin turin an chah.

Helpline betute hming, khua, phone number leh harsatnate chhinchhiah vek a ni a, chu'ngte chu ni tin Agriculture Minister hnenah an thehluh vek ṭhin thu helpline viltute chuan Vanglaini palai an hrilh a, "Kut hnathawktute harsatna kan dawnte chu Minister hoin kan enho ṭhin," an ti a; biak ngai leh bawhzui ngai bikte an sawiho ṭhin thu an sawi.

Kut hnathawktute'n an mamawh hrang hrang, a bikin thlai chî, thlai damdawi, power tiller leh thil dangte an thlen ṭhin thu Helpline viltute chuan sawiin, "Tun hnaiah Lunglei district lamah fall armyworm-in vaimîm a bawm thu loneitute'n an rawn thlen a, Lungleia department hotute kan hrilh nghal vat a, hma an la nghal," an ti.

Loneih leh thlai chungchanga harsatna nei, Helpline betute chu an awmna district-a District Agriculture Officer (DAO)-te leh DC-te an harsatna sutkianpui turin an biaksak ṭhin thu an sawi a; Minister-in a hriattir angin tun hnaia Mizoram hmun hrang hranga vaimim chî sem pawh a dawngtu turte'n an dawng ngei em tih finfiahin an biak leh vek thu Vanglaini palai an hrilh.