National Voters Day hman a ni

Nimin khan Mizoram hmun hrang hrangah National Voters Day vawi 6-na hman a ni a, Aizawlah chuan Governor Lt. Gen. Nirbhay Sharma hoa hun hman a ni.

Governor chuan, National Voters Day-in a tum ber chu India khua leh tui, vote nei thei tawh zawng zawngte vote neihtir vek leh sorkar ṭha awm theihna tura vote neih hlutna hriattir a ni tih a sawi a, “Vote thlak hi khua leh tuite chanvo, sorkar an khalh ngil theihna atana hmanraw ṭha ber a nih bakah, sorkar neitu dik tak an nihna nemnghehna a ni,” ti.

Vote nei tharte chu India ram rorelnaah a lawm luh thu sawiin Larsap chuan, an vote hlu tak chu chhia leh ṭha hriatna nen hlutsak taka hmang turin a chah.

Governor chuan Election Commission of India (ECI) thawhrimna, inpekna leh tunlai khawvel ṭhang zela an hmasawnnate tarlangin, “ECI chuan inthlan hlawhtlinna atan mipui thlawpna a pawimawhzia hriain, mipuiin vote thlak an hlut leh zualna kalpui a duh ber a ni,” a ti a; mipuite hnenah democarcy rama vote hlutna theihtawpa zirtir zel turin political party hrang hrang leh tlawmngai pawlte a sáwm.

Central YMA-in ‘National Civil Society Organization Award for The Best Campaign on Voter Education and Awareness’ an dawng chu a lawmpui thu a sawi a, “He award hi a ropui hle. Hei hian civil society hian eng nge inthlanna thianghlim, felfai leh muanawm a thawk thei a ni tih hriatna atan hman ni se ka duh,” a ti. Governor hian booth level officer (BLO) ti ṭha zual thlan chhuahte hnenah lawmman a hlan a ni.

Inkhawmah hian chief electoral officer (CEO) Manisha Saxena, state election commissioner (SEC) L Tochhong leh MPF general secretary Dr R Lalbiakmawiate pawhin thu an sawi.