District tinah National Voters Day hmang

Nimin khan India ram hmun dang-te rualin MIzorama district khawpui tinah National Voters Day vawi 6-na hman a ni a, district tinah hian DC-te ṭheuhin hmanpuiin, Assembly bial tina booth level officer ti ṭha berte hnenah lawmman hlan a ni.

Lungleiah chuan National Voters Day hi Saikuti Hall-ah hman a ni a, Election officer Mark Lalthanliana'n kaihruaiin, DC Ashish Madhoarao More khuallian a ni. Bawrhsap chuan, National Voters Day chu Election Commission of India thu-chhuak angin January 25-ah kum 2011-a hman ṭan a nih thu a sawi.

Ashish Madhoarao More chuan, India danpuiah tu pawh an intluktlang vek tih sawiin, inthlannaah mipuite tel lo chuan roreltu a thlan theih loh tih a sawi a, "Kum 18 tling, EPIC neite tan zalen leh felfai takin vote an thlak theih hi an chanvo a ni a, vote thlak loh chuan mipuiin rorelnaah hlutna an nei lo a ni," a ti.

Lunglei district-a constituency pasariha BLO ti ṭha ber ṭheuhte hnenah lawmman sem a ni a, Rs. 3,000 leh thuchei pek vek an ni. Lawm-man dawngtute chu - South Tuipui bialah C Tincheuva, Nghar-chhip; Lunglei North bialah PC Lal-biakruala, Lunglei DEO Office; Lunglei East bialah PC Khawlkunga, Ramthar Veng; Lunglei West bialah Hmingthanghluana, DRO Office; Lung-lei South bialah Sailothanga Sailo, ṭhai-zawl; Thorang bialah Zohranga, Lungchem leh, West Tuipui bialah V Lalnunsanga, Chawilung te an ni.

Saihaah chuan DC Conference Hall-ah hman niin, DC R Zarzo-sanga'n a hmanpui. DC chuan, vote neih hlutzia hriaa ngaisang thiam tur-in kal khawmte chu a chah a, "Vote kan thlak hian kan aiawh kan thlang a ni tih i hre chiang ang u. Election Branch leh a buaipuitu thawhrimna zarah electoral roll felfai leh rintlak kan tichhuak leh thei hi a lawmawm hle a ni," a ti.

Saihaah hian an district chhunga booth level officer hnathawk ṭha thlan chhuah mi pahnih hnenah lawmman Rs. 3,000 ve ve hlan a ni a; chungte chu - Saiha bialah Hrangkhuma leh Palak bialah Lalthanzauva te an ni. Saihaa EPIC nei thar ṭhenkhatte hnenah EPIC hlan a ni bawk.

Lawngtlaiah chuan DC Conference Hall-ah hman a ni a, DEO leh DC J Hmingthanmawia'n a hmanpui. Khuallian chuan, democracy lungphûm chu mipuite'n ram hruaitu tur zalen taka an thlang ṭhin chu a nih thu a sawi a, "Khua leh tui dik tak vote thlak thei zawng zawngte electoral roll-a kan thun luh a, vote thlak nachâng nasa zawka an hriat a ṭul a ni," a ti.

Bawrhsap hian kum 18 tling thar electoral roll-a thun tharte hnenah EPIC a hlan. An district-a Assembly bial pathuma BLO ti ṭha ber ṭheuhte hnenah lawmman hlan a ni bawk.

National Voters Day hi Ser-chhipah chuan DC Conference Hall-ah hman a ni a, Serchhip district election officer leh bawrhsap Dr Lalrozama'n a hmanpui. DC chuan, ram hruaitu thlan chhuahte azirin ram a ṭhangin a ṭhang lo thei tih sawiin, "Voter-te kan pawimawh em em a, ram leh hnam hmasawnna hnuk kan ni tih kan inhriat chian thar fo a ṭul," a ti.

Serchhipah hian district chhunga Assembly constituency pathuma kum kal taa BLO thawk ṭha thlante hnenah lawmman thuchei leh Rs. 3,000 ṭheuh hlan a ni. BLO ṭhaa thlante chu - Serchhip bialah C Hmingthanmawia, Thenzawl-III Polling Station, Tuikum bialah Hmingtharchuanga, Baktawng-III Polling Station leh Hrangturzo bialah Lalsangliana, Khawlailung-II Polling Station-te an ni.

Champhaiah chuan DC pisa tualah hman a ni a, Champhai DC leh DEO Vanlalngaihsaka khuallian a ni. DC chuan, India ram chu khawvela democracy ram lian ber a ni tih sawiin, democracy nihna tak tihlawhtling turin vote nei zawng zawngte'n inthlan hunah vote an thlak ngei a ṭul thu a sawi.

DEO chuan Champhaia vote nei thar zinga mi 12 hnenah EPIC a hlan a; Champhai district-a Assembly bial pasariha BLO ti ṭha berte hnenah lawmman sem a ni. Champhaia sorkar officer te, political party leh tlawmngai pawl hruaitute an tel.

Kolasib-ah chuan Diakkawn YMA Hall-ah hman a ni a, Kolasib DC leh DEO H Lalengmawia khuallian a ni. DC chuan, kumina National Voters’ Day thupui, ‘Inclusive and qualitative participation’ tih a sawi a, "Khua te tui dikte chuan kum 18 tling tawh chu electoral roll-a inthun luh nacháng hria a, inthlannaah vote kan thlak ngei hi kan tihmâkmawh a ni," a ti.

Kolasib Bawrhsap hian Kolasib district-a Assembly bial pathuma BLO ṭha ber ṭheuhte lawmman a hlan. Best BLO-te chu - Tuirial bialah Zairemmawia, Hortoki-II; Kolasib bialah James Lalthlamuana, Kolasib Venglai-I leh, Serlui bialah Vanlalruata, North Hlimen-te an ni.

Mamitah chuan DC Conference-ah hman a ni a, DC leh DEO Lalbiaksangi khuallian a ni. DC chuan, electoral roll felfai tak Mamit district-in a neih theih nana Election Branch-te thawhrimna leh hmalaknate a fak a, "Election official, political party, NGO-te leh khawtlang hruaitute thawhhona a fakawm hle a ni," a ti.

Mamit-ah hian district chhunga Assembly bial pathuma BLO thawk ṭha ber ṭheuhte hnenah lawmman Rs. 3,000 leh thuchei hlan ṭheuh a ni a; chungte chu Mamit bialah Hmingthankunga Varte, New Eden; Dampa bialah T Sangchhunga, Saithah leh Hachhek bialah Vanlallawma, Damparengpui-te an ni.