Chief Minister hoin lo hâl hun tur bithliah

State Level Committee on Fire Prevention chu nimin khan an chairman, chief minister Lal Thanhawla hoin CMO conference room-ah an
ṭhukhawm a; CM chuan, ram tikângtute na zawka hrem dan ngaihtuah a hun tawh thu a sawi.

Chief Minister chuan, pipute'n lo an hâl avanga kângmei chhuak thei lakah an fimkhur ṭhin thu sawiin, "Tunah hian kan peih ta vak lo em ni. Ram tikâng duh hrim hrim misual kan awm a, sorkar hun tiam chhunga hâl duh lote leh roadside reserve hâl duhte an awm hi na taka a hrem dan kan ngaihtuah a hun hle tawh. Kan ram a kan chhiat lutuk hmain eng emaw kan tih a ṭul," a ti.

Meeting chuan, Sub-Committee-in a rel tawh angin, kuminah Fire Prevention Week chu kum dang aia hmaa hman nise tih chu an pawm a, February 10-16 chhunga hman turin an rel.

District hrang hrangah lo hâl hun inanga neih a harsat avangin kum danga tih ṭhin angin, March 15 aia tlai loah hâl zawh vek ni se an ti a; Lengpui Airport leh a chhehvel khuate leh Kawnpui thlengin meikhuin thlawhtheihna ṭum leh chhuak a tihbuai loh nan chawhnu dar 3 hnuah chauh hâl ni se, an ti bawk.

Meeting-a tarlan danin, kum 2015 chhungin lo hâl hun bituk zâwm lo khua eng emaw zat a awm a, Lunglei district bikah chuan khaw 145-ah khaw pathum chiahin an zâwm lo. Lo hâl hun bituk zawm loh hi Committee chuan a ngai thutak hle a; DC, DLAO leh V/C-te chu lo hâltute list ṭha taka vawng tur leh dan zâwm lote chhinchhiah tura hriattir an rel a ni.