Congress-in candidate an tifel tawh; MNF leh ZPM-in bial khat la tifel lo

Kumin kumtawpa MLA inthlan lo awm turah Congress Party chuan an candidate tur an tifel tawh nia thudawn a ni a, MNF leh ZPM chuan bial khat ve veah candidate tur an la tifel lo thung.

Congress Party chuan an MLA neih mek panga zinga pali chu an bial ngaiah an dintir leh dawn a, Palak bialtu MLA KT Rokhaw chu a bial ngaiah MNF ticket-in a ding tawh dawn thung nia hriat a ni. Congress chuan he biala MNF ticket-a lo ding tawh IP Junior an candidate dawn thung.

An office bearer (OB) te candidate an ni vek dawn a, an president Lalsawta chu Aizawl West-III-ah a ding dawn a, sr. vice president Lal Thanzara chu Aizawl North-III ah, vice president Lalnunmawia Chuaungo Aizawl North-I ah leh treasurer Dr Lalmalsawma Aizawl South-II ah an ding dawn.

MNF nomination committee chu September 23, Inrinni khan an ṭhukhawm a, candidate tur an la tihfel lohna bial pakhat zawk Aizawl South-II a ding turin inthlan hmasa-a an candidate Denghmingthanga an ruat nawn. Assembly speaker Lalrinliana Sailo bial Chalfilha ding tur an la ruat lo.

An MLA ni lai zingah Lalchamliana chu a ding tawh dawn loa, MNF ticket-a Siaha bial aṭanga thlan tlin Dr K Beichhua pawh an party aṭanga hnawhchhuah a nih tawh avangin MNF ticket-in a ding tawh dawn lo. R Lalzirliana leh Robert Romawia Royte chuan an bial an thlak dawn a, a bak zawng chu an bial ngaiah an ding dawn.

An OB zingah president Zoramthanga leh sr. vice president Tawnluia chiah candidate an ni dawn a, an bial ngai Aizawl East-I leh Tuichangah an ding leh ve ve dawn.

ZPM chuan bial 39-a ding tur an puang tawh a, Tuichawng biala ding tur an la tifel lo. Tuichawng biala ding tur hi headquarter-in ruat loin, anmahnia in ruat tura tih an ni.

An MLA nilai parukte chu an bial ngaiah an ding leh ṭheuh dawn. OB zingah leader Lalduhoma a bial ngai Serchhipah a ding dawn a, working president K Sapdanga chu Aizawl North-III ah leh vice president Lalthansanga chu Aizawl East-I ah an ding ang.