VC/LC inthlan hun a la hriat loh

State Election Commission (SEC), Mizoram hotute chuan, Mizorama village council leh local council inthlan buatsaih theih a nih veleh buatsaih tura hma an lâk thu an sawi. Inthlan hun tur erawh hriat theih a la ni lo.

Vanglaini palai zawhna chhangin state election com­missioner (SEC) Laima Chozah chuan, VC/LC inthlan buatsaih theih hun tur hriat theih a la nih loh thu a sawi a, "Covid-19 vanga buaina a kian huna inthlan buatsaih vat theih turin hman kan la. May thla hnu lamah inkhàrkhip pawhsei a nih loh a, inthlan buatsaih a nih chuan VC/LC term pawhsei kher ngai loin, inthlan kan buatsaih hman kan ring," a ti.

SEC hotute sawi danin, VC/LC inthlan atan hian electoral roll peih a la ni lo. Complaint duh neite tan leh siamṭhat ngai awmte siamṭhatna hun hawn a nih hmain inkhàrkhip puan a ni. Electoral roll tih loh thil dangte chu tihfel a ni tawh. Electoral roll-a voter awm dan azirin sorkarin veng leh khuaa VC/LC member tur zat a bituk a ngai dawn a ni.

VC/LC ding mekte term tàwp hun chu May 7, 2020 kha a ni a, Mizoram sorkar chuan thla thum chhung, August 7 thleng a pawtsei a ni. Eng emaw harsatna bik a awm a nih chuan state sorkarin thla 18 thleng VC/LC-te term pawtsei turin thuneihna a nei.

Kumin kum tàwp lama term tawp tur Aizawl Municipal Corporation (AMC) inthlan hun tur pawh hriat theih a la ni lo a, councillor ni mekte hun chhung pawhsei leh pawhsei loh tur pawh hriat theih a la ni lo.