MJA member-te'n IIM, Shillong an tlawh

National Integra­tion Tour-a kal mek Mizoram Journalist Association (MJA) member-te chuan nimin khan Indian Institute of Mana­gement (IIM), Shillong an tlawh a; an hotute chuan, Mizoram Youth Commission (MYC) nen an thawhho mek thu leh, hmarchhak state-a sorkar leh private company-te thawhpui an inhuam thu an sawi.

MJA member-te hi IIM director Prof. DP Goyal leh a thawhpuite'n an lo dawngsawng a: Director chuan IIM an tlawh chu lawmawm a tih thu leh hlâwkna eng emaw tal an neih belh a beisei thu a sawi.

IIM faculty Dr Carnel Dinesh Adhikari chuan, IIM Shillong chu hmarchhak state-te ta a nih thu leh NE state hrang hrang sorkar leh company-te training an pek ṭhin thu a sawi a, "Training leh a kaihhnawih thil atan thawhpui kan inhuam hle a ni," a ti.

Chanchinbumite hi IIM faculty Dr Sanjeev chuan an hmun­hmate a fan kual­pui a; a kalphung, zirlai lak dan, zirlaite dinhmun leh pawimawh dangte a hrilhfiah.

Dr Sanjeev chuan, Mizoram Youth Commission nen an thawk dun mek tih sawiin, "Skill Mapping for Youth of Mizoram tiin memorandum of understanding kan ziak," a ti a; an campus chhungah plastic lam chi an hman ngai loh thu a sawi bawk.

Dr Sanjeev sawi danin, IIM, Shillong hi kum 2007-ah din niin, kum 2008-a zirna kalpui ṭan a ni a, an campus chu acre 120-a zau a ni.

IIM-a zir turin graduate hnuah CAT paltlang a ngai a, state 27 aṭangin zirlai 700 chuang awmin, hostel-ah awmtir vek an ni. An zingah Mizo zirlai pakhat a awm. Zirtirtu (faculty) 40 leh non-teaching staff 60 vel an awm bawk.

Tour hi 2nd Assam Rifles buatsaih a ni a, Tour-a telte chu MJA member pariat leh zirtirtu pahnih an ni. China ramri Bumla Pass, Bhutan ramri leh Arunachal Pradesh hmun dangte an tlawh hnuah nimin khan Shillong an thleng a, vawiinah AR hotu ber Director General nen an inkawm ang.