PYD khawmpui a ṭiak

Mizoram UPC kohhran ṭhalai pawl, Pentecostal Youth Department (PYD) inkhawmpui vawi 27-na, Leisekawt Field, Serchhipa neih chu nizan khan a ṭiak.

September 22, Zirtawpni zan aṭangin inkhawmpui hi neih ṭan niin, Tk Lalbiaknia, Tk Ruatfamkima, John Zothansanga, Rev. Zoramthara, Pastor A Lalhmingsanga leh Rev. Thangliansanga ten rawngbawlna an nei a, palai 3,000 chuang an kalkhawm.

India ram chhung hmun hrang hrang aṭang bakin, Bangladesh, Myanmar leh USA aṭangin palai an kal a ni.

Inrinni nilengin rorel inkhawm neih a ni a, rorel langsar zual zingah General PYD hmalaknaa Counselling Centre din te, rampum huapa article leh hla inphuahsiak buatsaih te, ṭhalaite eizawnna kawnga hmasawn theih nana kawng dapsak te, zirlai thiam thei dinhmun harsa zawkte tana Education Board kaltlanga scholarship pekte leh General PYD hminga tirhkoh rawihte a tel.

Mizoram UPC PYD-ah hian member 12,742 awmin, mipa 7,931 leh hmeichhia 4,811 an ni.