MADC-ah dan loa zirtirtu lak an awm chuan dan angin hma kan la ang - DCMA Minister

District Council & Minority Affairs (DCMA) minister Robert Romawia Royte chuan Mara Autonomous District Council (MADC)-ah dan loa voluntary zirtirtu ṭhahnem tak lak nia report an dawn thu sawiin, "A dik a nih chuan dan angin sorkarin hma a la ang," a ti.

DCMA Minister chuan, MADC sorkarin dan loa zirtirtu an la nia report an dawn thu Vanglaini hrilhin, "Kan chhuizui ang a, a dik a nih chuan thil ti dik lotu chungah sorkarin dan angin hma a la ngei ang," a ti a, an report dawn chu sorkarin a ngaih thu tak thu a sawi.

Autonomous District Council (ADC)-te chuan Mizoram sorkar aṭangin sum an dawn ṭhin thu sawiin Robert Romawia chuan, "A hmanna tur ruahmana pawisa pek ṭhin an ni. MADC hian zirtirtu lakna tur sorkarah a dil loa, pek pawh an ni lo. Zirtirtu an la nia sawiahte hian post a awm lo hrim hrm," a ti.

Robert Romawia chuan dan loa politics khelhna atana appointment siam chi a ni lo tih sawiin, "Uluk taka chhuizui a ni ngei ngei dawn," a ti a; ADC-ah rorelna dik leh ṭha a awm chu Mizoram sorkar duhdan a nih thu a sawi.