An intiam anga vice president-a KS Thanga dah loah ZPM an puh

MNF Media & Publicity bultumin September 23, Inrinni khan August 24, 2023-a Congress Party aṭanga ZPM party-a lut, ZPM aṭanga tunhnaia chhuaklehtate chuan Aizawl Press Club-ah thuthar thehdarhtute an kawm a; ZPM-in an intiam anga vice president atana Congress MLA hlui KS Thanga an dah loh avangin ZPM an chhuahsan thu leh MNF party an zawm thu an puang.

MNF party zawm tharte chuan, August 24, 2023 khan Vanapa Hall-ah inthlan pui lo awm tura ZPM-in an candidate puanna leh campaign khuh­hawnna an neihnaah KS Thanga hoin ZPM party an zawm tih an sawi a, "Hun rei tak MLA leh minister a nih lai aṭangin Pu KS Thanga hi kan lo zui tawh a, Congress Party-ah chhan hrang hrang avangin kan awm ve a rem tawh lo a, kan hotupa berin Congress party a chhuahsan takah chuan kan inrâwn khawm a, ZPM lamah luh mai kan titlu ta a ni," an ti.

Congress party an chhuahsan hnuah party-a an lut leh dawn a nih chuan an pu ber KS Thanga chuan nihna zahawm ve tâwk tak nei se tih an duh thu an sawi a, "ZPM Vice President post kan dil sak a, ZPM vice president-ah kan hotupa hi min dah sak theih chuan ZPM kan rawn zawm ang, tiin thutlukna kan siam. ZPM Elected OB chuan Pu KS Thanga chu vice president atana dah an remtih thu kan hre ta a, ZPM zawm tur hian thutlukna kan siam," an ti a; Congress party-a KS Thanga nau te sang chuangin a hoin ZPM an zawm thu an sawi.

MNF party zawm tharte chuan ZPM-in an hotu­pa chu lenchilhin, vice president post an pek theih loh thu an hrilh tih an sawi a, "Hetiang a nih avang hian a hote eng emaw zat chuan loh theih loin bumtu party ZPM chu beidawngin kan chhuah san leh a, MNF kan zawm ta a ni," an ti.

Zawhna chhangin, KS Thanga zuitu mi 2,000 vel an awm thu leh eng­emaw zatin MNF an zawm thu an sawi a; KS Thanga chuan chawlh rih a duh nia an hriat thu leh ZPM party ala chhuahsan ve loh thu an sawi bawk.