Modi-a sum avanga development ai chuan Lal Isua vanga hmasawn kan thlang zawk - ZPM Leader

ZPM leader Lalduhoma chuan kar hmasa khan Lunglei, Lawngtlai leh Siaha district-a khaw hrang hrang a tlawh a; vantlang inkhawmah thu sawiin, "Modi-a sum avanga hmasawnna ai chuan, Lal Isua malsawmna avanga kan ram hmasawn hi keini ZPM chuan kan thlang zawk a ni," a ti.

Lalduhoma chuan, ram inrel­bawlnaah Pathian ram thleng turin ZPM chuan theihtawp an chhuah tih a sawi a, "Mipuite pawhin hemi chungchangah chuan min thlawp ṭha hle niin ka hria. Hemi kawnga harsatna lian tak min siamsaktu chu BJP leh a thurualpui party-te an ni. Central-ah BJP an sorkar hnua minority leh kristiante tana ṭha lo dân an pass hnem tawh zia kan hria a, Mizorama BJP-te hi kan ram tana pawi khawih tham leh enghelh tham an ni pawhin kan hre lo, amaherawhchu, state-ah MNF an sorkar a, BJP an support a, NDA an zawm a ni," a ti a, an tih loh tawp tur tiah MNF a puh.

Pathian ram a lo thlenna tur hian MNF-ten thil sual lian tak tiin BJP an thawhpui mek tih Lalduhoma chuan a sawi a, "Engvanga thawhpui tlat nge kan tih chuan, inthlan hmasaah sum tam takin an pui a, tun inthlanah hian sum an pek leh an beisei vangte pawh a ni mahna, kan hre tawh bik lo a ni. Modi-a sum avanga development ai chuan Lal Isua malsawmna avanga kan ram hmasawn hi keini ZPM chuan kan thlang zawk a ni," a ti.

Lalduhoma sawi danin, ZPM-te chuan mi chanchin a chhe lai an sawi ngawr ngawr a ni lo a, thil awm dan an sawi mai a ni. Mahni nihna ang ni lo puia mipui hmaa inlan a hun tawh lo a, an nihna ang ang hian mipui hmaah an inlan a hun tawh.

ZPM Leader chuan tunah hian Mizoram politics-ah thil danglam a thleng mek tih sawiin, "Inthlan kan hmachhawn mai dawn niin a lang a, mipui hian ruling tura beisei an nei a, tuna ruling party MNF leh Congress party pawh hian ruling tura rin an nei a ni. Tlàwm leh zah pawh dawn loin nasa takin an beih rawn luai luai mai a, chu chu ZPM party kan ni," a ti a; Mizoramah mahni duhthlanna thianghlim tak hmang theitu an pun zel thu leh politics-ah harh tharna a thlen mek thu a sawi.

ZPM thuchhuah tarlan danin, Lalduhoma hian a zin chhung hian khaw hrang hrang aṭangin ZPM party zawm thar mi 2,084 a lawmlut a; Lungzarhṭum MNF VC member zawng zawng ZPM-ah lawmlutin, ZPM VC thar a piang bawk a ni.