ZPM-in street campaign buatsaih

ZPM chuan September 23, Inrinni khan Aizawlah street campaign an buatsaih a, Electric Venga thusawitu ZPM working president K Sapdanga chuan, ZPM thil tum lian ber zinga mi chu kut hnathawktute chawisan a nih thu a sawi.

ZPM Working President chuan, Mizoramah a tam ber chu kut hnathawk an nih thu sawiin, "Thingtlang lamah chauh ni lo, khawpuiah pawh hian kut hnathawk kan tamin retheihna bawiha tang kan tam hle a, thingtlang lama retheihna aiin khawpui lama retheihna hian mipuite min nghawngna. Chuvang chuan kut hnathawktute dinhmun hi kan chawisan a ṭul hle," a ti.

Ṭhalai lehkhathiamte chauh ni lo, thiamna mumal nei lote hlei hlei tan ZPM chuan ngaihtuahna sengin, bana kaih policy an duang tih sawiin K Sapdanga chuan, "Kan ramah hian kan tu leh fate ṭhangthar lo kal zel turte tan eizawnna kawng hawnsaktu nih kan tum a ni," a ti a, hmasawnna chu thingtlang kilkhawr ber aṭanga ṭan a ṭul tih chu ZPM chuan an hriatchian thu a sawi.

Ramthar Venga thusawitu ZPM Legislature Party secretary Dr Vanlalthlana, bialtu MLA chuan, tling lo tak chungin kum 2018 khan a khingpui ṭha tak takte zingah vannei ber a nih thu sawiin, "Ka theih tawk he bial tan ka chhuah ve chungin in duhkhawp ka ni lo ang tih ka ring a, kan tih ve chhun chhun te he bialin min ngaihhlut sak tih ka hria a, he bialah hian tih tur hmachhawp tam tak kan la nei," a ti.

Dr Vanlalthlana chuan kalphung thar mipui sorkar, corruption a reh theihna atana hma la ngam sorkar din an tum tih sawiin; kum 2023 Election lo awm leh turah hian Aizawl North-II bial mipuite an vote hlu tak pe leh ngei turin a sawm.