Khawl leina tur CM-in a pe chhuak

MNF IT & Social Media Dept. chuan thuchhuah siamin, Greater Aizawl Water Supply Scheme (GAWSS) Phase-II tana khawl thar leina atan chief minister Zoramthanga'n cheng vbc. 1.5 a pek chhuah thu an tarlang.

MNF IT & Social Media Dept. tarlan danin, GAWSS Phase-II khawl electric motor 1700 KW pakhat chu September 15, 2023 khan a chhia a ni. He khawl hian ni khatah tui litre maktaduai 8 vel a pump chhuak ṭhin.

Chief Minister chuan Aizawl khawpui chawmtu tui pump khawl chhiat vanga mipuite leh department thawktuten harsatna an tawk chu pawi a tih thu a sawi a, "Mipui leh thawktute harsatna sutkian a nih thuai theih nan khawl thar leina tur chu a rang thei ang bera ngaihtuah nghal a ni," a ti a, mipuite harsatna pawh sutkian thuai a nih a beisei thu a sawi

Khawl chhiat vang hian nasa takin Aizawl khawpui chhung tuisem pawh a nghawng tih tarlangin MNF IT & Social Media dept. chuan, "Mipuiin harsatna an tawh mek chu rang taka sutkian a nih theih nan CM chuan khawl thar leh a behbawm ṭul dang leina tur sum SASCI hnuai aṭangin cheng vbc. 1.50 a pe chhuak nghal a ni," an ti.

MNF IT & Social Media Dept. chuan, "Mipuite harsatna sutkian a nih theihna tura rang taka hma latu leh khawl thar leina ngaihtuah nghaltu Chief Minister Pu Zoramthanga, Finance Minister kan nei hi a chhuanawm tak zet a ni," an ti bawk.