Minister hoin Silver Jubilee lawm

TS Luaia Middle School, Rengtekawn chuan September 22, 2023 khan an sikulah kum 25 an tlin an lawm a; minister K Lalrinliana'n hmanpuiin, jubilee lungphun a hawng.

K Lalrinliana chuan, sikul bultumtu (donor) TS Luaia chu Kolasib mi ropui zinga mi a nih thu leh tun dinhmun hi rawn hmuh ve se a lawm hlea a rin thu a sawi a, "Sorkarin zirna lamah nasa takin ṭan a la a, sum leh pai harsatna karah pawh a theih ang anga ṭhain zirna-in te enkawlna kawngah pawh hma a la. Zirtirtute leh khawtlang hruaitute'n zirlai ṭha tak tak chher chhuak zel tur leh ṭhahnem ngai taka sikul enkawl zel turin ṭan la ang che u," a ti a, sikul hotute hnenah sikul mamawha hman tur pawisa a pe.

Khualzahawm Lalrinsanga Ralte, MLA pawhin thu sawiin, "Naupangte'n aia upa zahna leh nun kawng ṭha an zirna leh rinna kawnga anmahni kaihruaitu chu zirtirtute an ni," a ti a, zirtirtute chu ṭhahnem ngai taka an mawhphurhna hlen chhuah tum turin a chah.

TS Luaia Middle School hi January 15, 1996-ah din a ni a, Silver Jubilee hi Covid-19 hri leng vangin a hun taka an lawm thei lo a, kuminah an lawm ta a ni. Headmaster leh thawktu pakuain zirlai naupang 116 an enkawl mek a ni.