KHAWTHLIR

GHC Judge-in tlawh

Gauhati High Court judge Justice Nelson Sailo chuan September 23, Inrinni khan Siaha District Court building leh Lawngtlai Judicial Quarters sak mek a tlawh a; a rang lama hna thawk zo turin contractor-te a chah. Siaha leh Lawngtlai a tlawhnaah hian sorkar hotu te, khawtlang hruaitute leh tlawmngaipawl aiawhte kawmin, thil pawimawh hrang hrang an sawiho.

Jubilee lawm

Kohhran Thianghlim, Mizoram chuan nimin khan an kohhran chanchinbu 'Zanlai Au Aw' kum 25 (silver jubilee) tlin Solomons Temple, Chawlhmunah an lawm. Zanlai Au Aw hi September 20, 1998-ah chhuah ṭan niin, tunah hian copy 90,000 vel sem chhuah a ni.

Photo Exhibition

Sorkar laipuia Ministry of Inforamation & Broadcasting hnuaia Central Bureau of Communication, Aizawl chuan Durtlang Leitan YMA Hall-ah Pohsan Maah, Meri Maati Mera Desh & PM Vishwakarma thupuia hmanga ni hnih awh Photo Exhibition an buatsaih chu September 23, Inrinni khan khar a ni a, bialtu MLA Vanlal­hlana'n a hman­pui.

Sikul thar lawm

Lengte khua chuan September 23, Inrinni khan Samagra Shiksa hnuaia din Lengte Secondary School thar lawmna leh lungphun hawnna an buatsaih a, bialtu MLA H Lalzirliana'n a hmanpui. Bialtu MLA a nihna ang leh sorkar ang pawhin Mamit bial chhunga khaw awm zawng zawngte tan theihtawp a chhuah zel tur thu a sawi. Tlaiah khawthlang huapin sikul thar lawmna ruai ṭheh a ni.

Motor pe

Aizawl North-II bialtu MLA Dr Vanlalthlana chuan September 23, Inrinni khan a bial chhung Ramthar Veng Branch YMA hnenah MLA fund aṭanga a lei motor (pick up) a pe. Motor hlan inkhawm Ramthar Veng YMA office-a buatsaihah Dr Vanlalthlana chuan, "MLA ka tlin tirha ka rilru a awm chu, NGO-te hian MLA fund hi an chang ve tur a ni tih hi a ni, chutiang chuan bial chhung NGO-te hnenah MLA fund hi sem rual a ni," a ti.