Pûkpui ramah MZU campus din tum a ni - Dr R Lalthangliana

Higher & Technical Education (HTE) minister Dr R Lalthangliana chuan nimin khan Lunglei Convention Centre-ah Mizoram University (MZU) Southern Campus din tur lawmna inkhawm a hmanpui a; MZU Southern Campus chu Lunglei Pukpui ramah din tum a nih thu a sawi.

MZU Southern Campus din tur lawmna inkhawm hi Lunglei district High Powered Committee (HPC) leh NGO Coordination Committee buatsaih a ni a; Dr R Lalthangliana chuan, MZU Southern Campus din phalna hmuh a ni chu Pathian malsawmna a nih thu sawiin, Pûkpuia Engineering College building chu temporary campus atan cheng vbc. 11 sénga thawm ṭhat  mek a nih thu a sawi a, "Permanent campus pawh Pûkpui ram chhungah din tum a ni," a ti.

HTE Minister chuan, "MZU Southern Campus hi class ṭan thuai thei tura hmalakna chak taka kalpui mek a ni. Hei hian Mizo mipui zingah zirna lama harh tharna a thlen ngei ka beisei. Mizoramin hma a sawnna turin degree nei satliah ni lo a, thiamna daihzai leh chhawr tlak neih a ṭul," a ti a; campus leh building ṭha leh changtlung tak din ngei a nih theih nan mipuite'n neitu rilru pu chunga mahni zawn ṭheuhah theihtawp an chhuah a ngaih dawn thu a sawi.

Lunglei West bialtu MLA C Lalrinsanga, minister pawhin thu sawiin, MZU Southern Campus chu Mizoram chhim lam district-te tan malsawmna ropui tak a nih thu a sawi a; zirna chu industry péng pawimawh tak pakhat a ni tih sawiin, "Kan ṭhenawm Meghalaya leh state dangte angin kan zirna-inahte state páwn lam zirlai ṭhahnem tak an rawn zir chuan kan ram economy pawh nasa takin a tihmasawn dawn a ni," a ti.

MZU Southern Campus, Lungleia din turin Ministry of Human Resource Development chuan January 17, 2020 khan MZU Vice Chancellor hnenah phalna pek a nih thu a rawn hriattir a ni.