Myanmar aṭangin meizial leh ruihhlo a rawn lut rengah ngai

Champhai DC leh Champhai district Anti Tobacco Squad (ATS)-te thurel bawhzuiin nimin khan Champhai ATS, Excise & Narcotics, Police leh Legal Metrology-a thawktute chuan Zokhawthar leh Melbûkah squad drive an nei a; ram dang aṭanga lo lut meizial (cigarette) bawm lian (carton) 23 an man.

Vanglaini palai zawhna chhángin Champhai ATS hotute chuan, inkhàrkhip hnuah Myanmar aṭangin cigarette leh ruihhlo a rawn lut ngeia an rin thu an sawi a, "Kumin March 22-ah Janata Curfew puan a ni a, chumi hnuah Mizoramah chuan inkhàrkhip nghal a ni. Cigarette hi lei tur a la awm reng a, rawn lut lo se stock-in a daih theiin kan ring lo," an ti a, cigarette chu man to tak taka hralh ṭhin a nih thu an sawi.

Champhai ATS hotute chuan, finfiahna awm lo mah se, ruihhlo pawh a rawn lut ru ngeia an hriat thu an sawi a, "Champhai leh a chhehvela ruihhlo ti ṭhinte hi an la rûi thei reng a ni," an ti.

Nimina squad drive-a kalte sawi danin, ramria duty ṭhenkhat chuan theihtawp chhuah mah se, ramri vèn sèn a nih loh thu leh Mizorama thil lak luh tum an man zauh zauh thu an sawi a ni.