Cheng vbc. 1.79 tihchingpen thubuaiah CADC Chairman ni lai thiam loh chantir

Aizawl District Court-a special judge (Prevention of Corruption Act) Dr HTC Lalrinchhana chuan Chakma Autonomous District Council (CADC) chairman ni lai Kali Kumar Tongchangya chu CEM a nihlaia cheng vbc. 1.79 tihchingpen thubuaiah nimin khan thiam loh a chantir a, vawiinah a hremna tur puan a ni ang.

Court judgement aṭanga a lan danin, District Council & Minority Affairs Under Seretary chuan, July 26, 2018 khan CADC chhunga hmasawnna hnathawhna sum tihchingpen ni ngeia hriat a nih avangin Anti Corruption Bureau (ACB)-ah FIR a thehlut a, ACB-te chuan an chhuizui a ni.

ACB-in he thubuai an chhuina aṭanga a lan dan chuan, Non-Lapsable Central Pool of Resources (NLCPR) hnuaiah kum 2009-2013 chhung khan CADC hian Longpuighat leh Kukurduleya khaw inkar kawng siamna tur atan instalment thumin cheng vbc. 11.29 an dawng. Hetih lai hian Kali Kumar Tongchangya hi CEM niin, a sum tihchingpen hmuhchhuah chu cheng vbc. 1.79 a ni.

Hetih hunlaia CADC Executive Secretary cum DDO Digamber Chakma chuan dikhlel takin Rs. 9,03,773 a pe chhuak a, kum 2013 CADC inthlan dawnah Congress Party candidate mi 19-te hnenah campaign-na atan CADC sorkar sum chu pek chhuah a ni bawk a, a vaia sum chingpen chu cheng vbc. 1.79 a ni. Congress MDC candidate mi 19-te hi ACB chuan thurehtuah a hmang a ni.

ACB-hian heta pawisa ching-pen aṭang hian cheng vbc. 1.26 chu an man let leh a, hei hi Mizoram sorkar sum bawma dah turin Special Court chuan a ti.

Thuhretu hrang hrang thusawi leh ACB-te thil man hrang hrangte bûk a nih hnuah Special Court chuan Kali Kumar Tongchangya hi thiam loh chantirin, jail-a dah nghal turin a chungthu a rel. Vawiinah hrem a nih dan tur a puang ang.

Kali Kumar Tongchangya hi ṭum li CADC MDC atan thlan tlin a ni tawh a, inthlan hnuhnung ber khan Fultuli bial aṭanga thlan tlin niin chairman atana thlan a ni.