Lamka - Aizawlah helicopter service dawn; a service dan tur kimchang a la hriat loh

Directorate of Transport, Manipur chuan thuchhuah siamin, Ministry of Home Affairs ruahman angin Lamka (Churachandpur) to Mualpui, Aizawl inkarah helicopter a service ṭan dawn thu an tarlang. Hetihlai hian, helicopter service dan tur kimchang Mizoram sorkarin a la dawng lo.

Directorate of Transport tarlan danin, helicopter chuan man (rate) tur, Lamka - Mualpui Helipad chu Rs. 4,500 niin, Mualpui via Lengpui Airport - Lamka chu Rs. 6,000 a ni. Helicopter ticket hi Churachandpur-ah hian T Khaiminlal Haokip, BO, SDC (mobile no - 8837420509), Lianzapau Samte, Office Assistant, DC's office (mobile no. 8974452664) leh Aizawlah chuan C Lalrinfeli i/c helicopter service (mobile no. 9862374153)-ah te book theih a ni.

Vanglaini palai zawhna chhangin GAD principal consultant (Civi Aviation Wing) wing. commander J Lalhmingliana chuan, Lamka - Churachandpur inkara helicopter service tur hi hriattir an nih tawh thu a sawi a, "Nilainia rawn thlawk tur hi a bulṭanna tur a ni," a ti.

Engtik hunahte nge, dar eng zatahte nge a thlawh ṭhin dawn an la hriat loh thu sawiin J Lalhmingliana chuan, "Nilainiah a rawn thlawk phawt ang, a bak chu ruahmanna siam chawp a ni turah kan ngai," a ti a, ticket pawh an rawn thawnve loh avangin Aizawla book duh tur tan an chah mek thu a sawi.

Helicopter service tur chu Global Vectra Helicopter Ltd.- te'n buaipuiin, VT-GVA/BELL 412 (Helicopter) a ni. Global Vectra Helicopter Ltd. pilot-te chuan test flight an lo nei tawh.

Indigenous Tribal Leader Forum (ITLF) leh Union Home Minister Amit Shah-te Delhi-a an inbiaknaa an thurel zinga pakhat chu Lamka leh Lengpui Airport inkara helicopter service hi a ni.