Sorkar leh an inrin tawh loh avanga Lokayukta tihdanglam tumah MNF puh

ZPM leader Lalduhoma chuan, MNF party-in kumin inthlanpui lo awm turah sorkar an inrin tawh loh avangin thubuai an neih theih laka inven nan Lokayukta hotute tihdanglam an tum niin a sawi a; kalpui zui tawh lo turin sorkar a ngen.

Lalduhoma hian nimin khan thuchhuah siamin, sorkar thuhnuaia awm loa lai taka rorel thei tur nihna sang tak nei - MPSC Chairman leh Secretary tur te, Lokayukta Chairman leh Secretary tur te leh Chief Information Commission leh a member turte ruattu tur bik Selection Committee din a nih thu a sawi a, "August 29, 2023 khan Selection Committee hi an ṭhu a, chutah chuan MNF party leh sorkara chanvo lian tak chelh lai mek mi pakhat, a hming chu sawi ta lo ila, chu chu Lokayukta Chairman nih tir tumna leh a member atan SP ṭanglai pension ṭep tawh, IPS pawh la confer loh chu dah tumna a awm tih hriatchhuah a ni," a ti.

Lokayukta Chairman term hi March 2024-a tawp chauh tur a nih thu sawiin Lalduhoma chuan, "Term a tawp hma leh inthlanpui puan a nih ṭep tawh laia ruahmanna an kalpui ta mai hi ngaihzam mai mai chi ni theiin kan hre lo. Hetiang thil an ngaihtuahna chhan ber ni awm a lang chu - MNF hian inthlan lo awm turah hian sorkar an inring tawh lo a, sorkar thar hnuaiah thubuai chi hrang hrang nei dawna inngaihna hi an nei a, chumi an hlauthawng chuan chu’ng laka lo inven lâwk nan anmahni humtu tur Lokayukta hi tun aṭanga lo buatsaih duhin an pawngsual ta mai niin alang," a ti a; kalpui zui tawh lo turin a ngen.

ZPM Leader sawi danin, Selection Committee-ah hian sorkar dinglaite'n an mi duh zawng leh an sangawizawnpui theih tur mihring an dah mai mai loh nan Opposition Leader telh ve ngei tur a ni tih danin a phut tlat a; Opposition Leader an lo awm lem loh pawhin Principle of Natural Justice kenkawh a nih theihna turin Legis-lative Assembly-a group lian ber leader chu he committee-ah hian telh a ni ve mai ṭhin.

Lalduhoma chuan, "Pu Hawla hunlai pawh khan group leader ka nihna angin min telh ve mai ṭhin. Pu Rama CM a rawn nih nawn leh hnuah erawh hi chuan Lokayukta Chairman ruatna tur bikah hian min telh ve duh ta lo," a ti a; Selection Committee an dinah hian chairman chu Chief Minister niin, Assembly Speaker leh Guwahati High Court Judge-te chu member an nih thu a sawi.

February 8 & 9, 2019 khan meeting pangngai pawh ko loin video conferencing hmangin meeting an nei a, chutah chuan Opposition Leader chu Selection Committee-ah telh ve kher a ṭul lo tiin thutlukna an siam tih sawiin Lalduhoma chuan, "Chuta ṭang chuan ka tel ve ta lo a ni. Amaherawhchu, mak ang reng takin a hnu lama Selection Committee lo awm lehah hian min telh leh lawi si a, Chief Information Commissioner atana Pu Lalnunmawia Chuaungo, IAS ruat a nih dawn pawh khan min telh ve leh tho. Hetia Lokayukta Chairman ruatna tur bik chauha min han telh duh lohna chhan hi chhan engemaw tak a nei a ni tih chu tunah hian a lo lang ta a ni," a ti.

Lalduhoma chuan, sorkar hmasate sulhnu chhui a, thubuai lian tak tak inneihtir a, inchhui chiam chiam chu a mimal duh dan a ni ngai lo tih sawiin, "Sorkar thar chuan dik tak leh huaisen takin, anmahni hun aṭangin hma an la mai turah ka ngai a. Kan party ngaihdan phei chu ka hre lo a, ka mimal ngaihdan chuan sulhnu inchhui chiam chiam hi thil ṭul niah ka hre lo. Sorkar thar aṭangin rilru thar puin, mi tinin insiamṭhatna hun neiin hma kan la mai tur a ni tih hi ka mimal ngaihdan a ni," a ti a, Pathian leh mipui zarah ZPM-in sorkarna an siam a nih chuan MNF-te chu hlauthawng lo tur leh thlamuang taka awm turin a chah nghal.