Women Reservation Bill pass Mizoram BJP-in lawmawm a ti
BJP Mizoram spokesperson Lalremsangi Fanai chuan nimin khan Aizawl Press Club-ah thuthar thehdarhtute a kawm a; Lok Sabha leh Rajya Sabha-a hmeichhiate tana seat 33% (1/3) zuahna tur Women Reservation Bill pass a ni chu an lawm thu a sawi.
Lalremsangi Fanai chuan, BJP kaihhruai NDA sorkar hnuaiah kawng hrang hrangin India ramin bung thar a kai tih a sawi a, "Democracy, demography, diplomacy kawng dik zawhna aṭanga hetiang dinhmun thleng thei kan ni. India ram hruaitute lungrualnate, hnam leh sakhaw inthliarna awm lo 'India Secular' zia a lantir a ni," a ti.
India danpui (constitution) siamṭhat dawnin hnam leh sakhaw tlem zawkte chhungah zirtirna dik lo, insawiṭhaihna a awm ṭhin nia sawiin Lalremsangi chuan, "India Constitution siam ṭantirh aṭangin siamṭhatna (amended) vawi 100 chuang awm tawhah hian hnam tlem emaw, sakhaw zuitu tlemte tana chimral theihna tur hawi zawngin bill pass/siam a la awm ngai lo," a ti a; mi tupawhin hnam leh sakhua tihdan phung a nunpui thei a, sakhua pawh a duhzawng a be thei tih hriatchian fo a ṭul thu a sawi.
Lalremsangi chuan Women Reservation Bill chu India rama hmeichhiate'n state leh national level-a rorelnaah dinhmun pawimawh lehzual an chelhna bakah, inchhung khur, vantlang nunphung tinrengah famkimna, New India a thlen chhinchhiahna a nih thu a sawi bawk.