ASF vangin kuminah vawk 1,524 thi tawh; Khua/veng 27-ah vawk pùl hri a leng mek

Vawk pùl hri, African Swine Fever (ASF) vangin kuminah Mizorama khua/veng 27-ah vawk 943 a thi a, hri darh zel tur vèn nan vawk 581 suat niin, kumina ASF vanga vawk thi leh suat hi 1,524 a tling.

AH&Vety department hnen aṭanga thudawn danin, kuminah ASF hri hi district paruka khua/veng 27-ah a leng tih finfiah a ni tawh a; Khawzawl district-a Kawlkulh khuaah vawk pùl hri vanga vawk thi 342 awmin, khua/veng 27 zinga vawk thi tamna ber khua a ni.

Kuminah May 5 aṭang khan Mizoramah ASF vanga vawk thi a awm ṭan a, September 22, 2023 thleng khan district ang pawhin Kawlkulh khuaa ASF vanga vawk thi aia tam vawk thihna a awm lo.

ASF vang hian March 21, 2021 aṭangin Mizoramah vawk a thi ṭan a; March 21, 2021 aṭanga December 31, 2021 chhung khan ASF vanga vawk thi 33,417 leh suat 12,568 a awm. Nikum 2022 khan February thla aṭangin Mizoramah ASF hri a darh leh a, nikum khan vawk 12,791 a thih bakah, vawk 11,594 suat leh a ni bawk.

Kumin 2023-ah May 5 aṭang khan Champhai district-ah vawk hri vang hian vawk a thi leh ṭan a; AH&Vety department chhinchhiah danin kumin bikah May 5 - September 22, 2023 thleng khan district paruka khua/veng 27-ah ASF a léng tih finfiah tawh niin, hri vanga vawk thi 943 leh hri darh tur ven nana suat 581, a vaiin ASF vanga vawk thi leh suat hi 1,524 a ni.

Mizorama ASF hri a lèn ṭan tirh kum 2021 March 21 aṭanga September 22, 2023 thleng khan ASF vang hian vawk 47,151 a thi tawh a, vawk suat 24,743 awm tawh bawk a, ASF vanga Mizorama vawk thi zawng zawng chu 71,894 a tling tawh a ni.