Governor-in bengdar a sem

Governor Dr Hari Babu Kambhampati chuan nimin khan Raj Bhavan-ah World Day of the Deaf Day denchhenin bengdar mamawhtu zirlai 25 hnenah bengdar a sem a; Health minister Dr R Lalthangliana'n a hmanpui.

Bengdar hi COAL India Limited hnuaia corporate social responsibility (CSR) aṭanga Deen Dayal Sravana Foundation (DDSF), Andhra Pradesh-in an lakchhuah a ni a; Mizoramah mi 320 hnenah pek tur niin, pakhat Rs 20,000 vel man a ni a, a vaiin cheng nuai 640 man a ni. Kumin October thlaah Mizoram hmun hrang hranga zirlai thlan bikte hnenah pek hman vek tura ruahman a ni.

Dr Hari babu Kambhampati chuan, Mizorama zirlaite zinga beng lama harsatna neite tana COAL India Limited hnuaia CSR kaltlanga bengdar sem a ni chu lawmawm a tih thu a sawi a, "Beng lama harsatna tawkte chu khua leh tuiten kan theih angin kan ṭanpui a ngai a, Ministry of Social Justice and Empowerment hnu aiah disabled persons for purchasing / fitting of aids / appliances (ADIP) kaltlangin beng lama harsatna neite tan ṭanpuina a dawn theih," a ti a; ZMC pawh hemi kawnga hmala thei tura ruat zingah a tel nia a hriat thu leh hun rei loteah ZMC kaltlanga he hmalakna hi kalpui a nih tur thu a sawi.

Health minister Dr R Lalthangliana pawhin thu sawiin, "Governor ṭhahnem ngaihna zarah a sum zawnga teh pawha cheng tam tham tak senna tur, zirlai beng ṭha lote tana thil ṭangkai tak tih a lo ni ta hi a lawmawm hle a, bengdar semchhuah takte rawn la chhuaktu DDSF chungah pawh kan lawm takzet," a ti a, DDSF-te chu Mizoramin a mamawh anga hmalakna huang rawn zauh zelin turin a sawm nghal bawk.

World Day of the Deaf puala hun hman hi Health principal secretary Esther Lal Ruatkimi'n a kaihruai a; Governor hian Redeem Garden & Ephatha Special School naupang 21 leh Ephatha Special School naupang palite hnenah bengdar hi a sem. Civil Hospital Aizawl-a ENT surgeon Dr Lalramnghaki'n World Day of The Deaf thupui, 'A world where deaf people everywhere can sign anywhere' tih hmangin thu a sawi bawk a ni.

Nimin vek khan DHME conference hall-ah bengdar vuah ngai mi 177-te measurement (ear mould inpression) lak a ni a; September 27, 2023 hian Lunglei Civil Hospital-ah Lunglei district-a mi 36, Hnahthial district-a mi pali, Lawngtlai district-a mi 24, Siaha district-a mi pakhat, an vaiin mi 65-te ear mould impression tihsak an ni leh ang. Champhai district-a mi 67-te tan pawh hun remchang hmasa bera neih ve leh tur a ni.