Lungleiah ukilten sorkar laka an lungawi lohna an lantir

BAR Association Sub. Headquarters, Lunglei chuan nimin khan an office tur atana sorkarin a pek tawh, department dang hnena an pek leh avangin lungawi lohna an lantir.

Lunglei aṭanga thudawn danin, September 2, 2023 a hawn Zonal Geology and Mining office, Lunglei chu district court building sakna tura sorkarin a pek tawh hmuna hawn a nih avangin, Lungleia ukilte chuan lungawi lohna hi an lantir a, Lunglei District Court-a hnathawkte office kal tur an dang.

BAR Association Sub Headquarters, Lunglei hruaitute chuan September 2, 2023-a Commerce & Industries minister Dr R Lalthangliana’n Zonal Geology and Mining office a hawnna hmun, Trade and Commerce Building chu Lunglei District Court sakna tura sorkarin a pek fel tawh a nih thu sawiin, office hawn thar chu sawn chhuak turin sorkar an phut.

Lunglei District Court building sakna tur chu a hranpaa land leased siam tura sorkar an phut thu sawiin BAR Association hruaitute chuan, "Court Building sak tura kutthlak tur pawhin sorkar kan phut," an ti.

BAR Association, Lunglei hruaitute chuan September 19, 2023 khan sorkarah an thil phutte an thlen tih sawiin, "Kan hun tiamchin a ral thlengin engmah chhanna kan dawng lo," an ti a, sorkar aṭanga an thil phutah hlawhtlinna an hmu lo a nih chuan tiamchin awm loa lungawi lohna lantir an tum thu an sawi.

BAR Association Lunglei chuan Court Building tura DPR siam pawh remtih vek tawhna hmun, Trade and Commerce Building-ah Zonal Geology and Mining office hawn a ni chu ṭha lo an tih thu pawh sawiin, "Thawktute sawn chhuah nise kan duh," an ti.