BJP paihthla turin INDIA a inbuatsaih - MPCC Spokesperson

MPCC chuan nimin khan Melbuk leh Zokhawthar khuaah street campaign an buatsaih a, thusawitu MPCC spokesperson Dr Lallianchhunga chuan central-ah BJP paihthla turin Congress Party kaihhruai INDIA a inbuatsaih mek thu a sawi.

MPCC Spokesperson chuan nakkum Lok Sabha inthlanpuiah Congress Party kaihhruai INDIA chu BJP paihthla turin a inbuatsaih mek a, mipui ngaihdan lakna zawng zawng deuh thawah Congress party kaihhruai INDIA chu chak tura rinkai a ni zel tawh tih sawiin, "Central-ah Congress kaihhruai INDIA-in sorkarna a siam chuan khawchhak nena insumdawn tawnna dinhmun pawh a ṭhat leh ngei a beiseiawm. Khawchhak nena insumdawn tawnna hi a hringtu chu Congress sorkar a ni a, a hringtu ngeiin chhungkaw sang tam takte harsatna hi a chingfel mai ang," a ti.

Kohhran mipuiten India ramah Lal Isua Chanchinṭha puandarhna atan theihtawpin kan sum neih remchan angte kan thawh ṭhin tih sawiin, "Mah se, Central BJP sorkar hnuaiah kan missionary-ten nekchepna leh dodalna an tawk nasa tulh tulh a ni. India ram hi sakhaw hrang hrangte zalenna ram a nih leh theihna turin Mizo mipuiten Congress Party kan thlawp tlat a ngai," a ti a, Mizorama kan zalenna ringawt hi a tawk loa, India ram state dangah pawh Kristiante kan zalen tur a nih thu a sawi.