Hneh takin kan chak dawn - RRR

Siaha District MNF chuan nimin khan Siaha Bazar-ah street campaign an buatsaih a, thusawitu MNF adviser Robert Romawia Royte chuan kumin kumtawpa MLA inthlan lo awm turah hneh takin MNF an chak dawn thu a sawi.

MNF Adviser chuan, MLA bial 40-ah an party boruak a sang chak hle nia sawiin, "MNF boruak san chakzia thlirin MNF-in hneh taka chakna kan chan ka ring. District council pathuma MLA seat nga pawh MNF-in kan lak vek theih nan ṭan kan la chho mek. ADC area-a mipuiten ruling party MLA an duh a, ADC area bial ngaah MNF kan chak vek a rinawm," a ti.

New Siaha biala MDC by-election neih turah pawh Pathian leh mipui zarah an chak ngei an beisei tih sawiin Robert Romawia chuan, "Mizorama ruling sorkar be eih thei leh Mizoram sorkar hmasawnna hnathawh dodal lo tur ngei New Siaha mipuiin MDC atan in mamawh," a ti a, MNF candidate vote tling ngei turin mipuite a ngen.

DCMA Minister chuan, ADC-te chu duhsak takin Mizoram sorkarin sum a pe ṭhin tih sawiin, "Sum kan pek dan ni lo, dan kalha sum hmang an awm chuan dan an hmachhawn zel a ngai dawn. MADC-in dan kalhin post awm loah mi tam tak election campaign nan appointment a pe nia report awm pawh chhuichian a ni ang a, thil tidik lo an awm chuan action lak a ni ang," a ti.

Robert Romawia chuan annual plan hnuaia central-in sum min rawn pek tur chiang sa cheng vbc. 2,600 chuang Covid -19 vangin a rawn pe lo tih sawiin, "Covid ṭanpui nana min pek pawh cheng vbc. 70 chuang awrh chauh a ni. Heti chunga Pathianin mal a sawm mek kan Chief Minister Pu Zoramthanga sum enkawl thiam vanga rilṭam leh chhuanchham tumah awm loa hun harsa kan sutlang thei hi a ropui," a ti a, mipuiin lawm nachang an hriat a ṭul thu a sawi.

MNF thuchhuah tarlan danin, street campaign-ah hian MNF Adviser hian an party-ah mi 377 a lawmlut a ni.