Ruantlang Water Supply Scheme

Minister of state TJ Lalnuntluanga chuan nimin khan a bial chhunga Ruantlang Branch YMA Hall-ah Ruantlang Water Supply Scheme (Solar Pumping) chungchang puanzarna hun a hmanpui a; Ruantlang Branch YMA Hall thawmthatna turin Rs 30,000 a hlan nghal.

TJ Lalnuntluanga chuan, tuna a dinhmun a ṭhu thei tura siamtu Champhai mipuite tan theihtawp chhuah a tum tlat thu a sawi a, "Champhai hmasawnna tura hna thawh kan tum mek laiin hripui a lo leng ta si a, Champhai hmasawnna aiin mihring damchhuahna tur ngaihtuah a ngai. Hripui a lo ziaawm hnuah ran lamah hri a leng leh a, lirnghingin min nuai leh bawk nen hun khirh tak kan tawng chho zut zut a ni," a ti a; Ruantlang khaw tan a theih ang anga hma a lak thu leh BDO pisa tur changtlung tak siam mek chu hawn theih thuai tum a nih thu a sawi.

Champhai Greater Water Supply Scheme aṭanga tui lakte mipuiin an kham khawp tawh lo tih sawiin Minister chuan, "Ruatlang chawmtu tur tui lakna chungchangah tui lakna tur hmunte enkual a nih hnuah Khelthliah aṭanga tui lak ni se kan ti a, DPR pawh siam tawh a ni. Mi 1,700 vel hmang tur an awm laiin, mi 6,000 vel hman theih tur tui pump chhuah a ni dawn a, ṭhenawm veng tui harsate puih inhuam ang che u," a ti a, sorkarin hmasawnna hna a thawh zel theih nan finchhuah zel turin kalkhawmte a chah.

Ruantlang Water Supply Scheme (Solar Pumping) hi ni khatah tui litre 5,00,000 pump thei tura ruahman niin, Solar Contractor-in kum nga chhung a enkawl zui dawn a ni.