Ramria duty tur Protection Squad mi 50 chin Sorkar laipuiin lak a phal - Forest Minister

Environment, Forest and Climate Change (EFCC) minister TJ Lalnuntluanga chuan nimin khan Champhai Bethelah Conservator of Forests, Eastern Circle office building thar a hawng a; sorkar laipuiin ramria duty tur Protection Squad mi 50 chin lak a phalsak thu leh thawktu indaih lohna phurukna atan hman an nih tur thu a sawi.

TJ Lalnuntluanga chuan, Champhai chu internaltional boundary-a awm a nih angin ramsa man a tam hle tih a sawi a, "Heng ramsa mante enkawl zui an nihna tur Rescue Centre din nan cheng nuai 1,091 sanction fel a ni tawh a, kar tharah chuan lung phum hman tum a ni. Ramria duty tur Protection Squad chu sorkar laipuiah dil niin, mi 50 chin phalsak kan ni a, state dang dil ve zingah hlawhtling awmchhun kan ni," a ti a, Protection Squad-te hi staff indaih lohna phurukna atan hman an nih tur thu a sawi.

Champhaiah Botanical Garden leh Nature Learning Centre changtlung tak nei tura hmalak mek a nih thu sawiin Minister chuan, "Khawpui chhunga ngaw siam turin Nagar Van buatsaih a ni a, khaw 14-ah hna thawh mek a ni. Champhai hi khualzin hipna hmun pawimawh taka hman kan tum a, Swadesh Darshan-2 hmangin Tlangsamah hmalakna tur hrang hrang kan nei," a ti a; kumtharah chuan Champhaiin hmelthar a neih ṭan tur thu a sawi bawk.

Khualzahawm Dr ZR Thiamsanga, MLA pawhin thu a sawi a, Champhai district tan hmasawnna thar ṭha tak tak hmuh tur a awm ṭhin chu lawmawm a tih thu a sawi.

Conservator of Forests, Eastern Circle pisa building hi cheng nuai 105.57 hmanga sak a ni.