Kolasib district-a ruihhlo do dan tur sawiho

Kolasib District Level Task Force on Ruihhlo Do chu an chairman John LT Sanga, bawrhsap kaihhruaiin nimin khan DC conference hall-ah an ṭhukhawm a; sikul eh kohhran hrang hrangah routine siamin ruihhlo ṭhat loh zia inzirtirna kalpui an rêl.

John LT Sanga chuan, ruihhlo chu theihtawpa do a ṭul thu a sawi a, "Excise, Police, YMA leh kohhran-te'n ruihhlo do kawngah ṭan la reng mah se, ruihhlo ngaite'n kan thâ thlah hun an lo chàn ve reng avangin hmalakna awm tawh sa belhchhaha hmalakna dang kalpui zel a ṭul," a ti a, mi tinte ṭangrual turin a sawm.

Ṭhutkhawmah hian hmalak dan leh hmachhawpte sawiho a ni a; Kolasib district aṭanga State Level Master Trainer atana ruat mi palite chuan, March 2024 hmain khawtlang leh kohhran hrang hrang 60%-ah ruihhlo ṭhat lohzia zirtirna kalpui hman an inbeisei thu an sawi.

Hmalakna chak zawk a awm theih nan District Level Master Trainer tur inruat belh ni se, sikul leh kohhran hrang hrangah routine siamin ruihhlo ṭhat lohzia inzirtirna hi kalpui ni se, an ti a; inzirtirnaah hian ruihhlo laka inthiarfihlim tura intiam theite tan intiamna hming an ziah hnanna tur (signature board) buatsaih an rêl bawk.