KHAWTHLIR

Thisen pe

Kulikawn Two wheeler Taxi Welfare chuan September 29, 2023-a an din champha (rising day) pualin nimin khan Civil Hospital, Aizawl-ah thisen unit 17 an pe a; Civil Hospital Poor Fund-ah Rs 6,000 an hlan nghal.

Police training

Election Commission of India (ECI) huaihawtin nimin khan Administrative Training Institute-ah Mizoram puma police-te zirtir chhâwngtu tur, Master Trainer atana thlan Mizoram Police officer mi 35 tan training buatsaih a ni a; ECI-in a rawn tirh West Bengal chief election officer Dr Ariz Aftab leh Tamil Nadu chief election officer Satyabrata Sahoo-te'n thil pawimawh hrang hrang an zirtir a ni.

Faina beihpuithlak

Faina beihpuithlakna Swachhta Hi Seva pualin nimin khan All India Radio (Akashvani) Aizawl chuan an pisaah hun an hmang a, AIR director Dr Lalropuia kaihhruaiin sorkar laipuiin faina kawnga thutiam a siam, Swachhta Pledge an sawirual. AIR pisa leh a chhehvel tifaiin an hnatlang nghal bawk a ni. Kumin Swachhta Hi Seva thupui chu ‘Bawlhhlawh awm lohna India ram’ (Garbage Free India) tih a ni a; September 15, 2023 aṭanga October 2, 2023 thleng hman tura ruahman a ni.

Ambulance hlan

Development of Backward Block Under Centre Sector Scheme of NEC chuan nimin khan Lunglei DC pisa tualah Bunghmun West RD Block tan ambulance maruti eco van Rs. 7,61,415 man Lunglei DC Ramdinliani hnenah an hlan. Lunglei DC chuan Lunglei district-a block hnufual chhawmdawl ngai hnena NEC kaltlanga ambulance hlan a ni chu lawmawm a tih thu sawiin, "Bunghmun PHC hnuaia khaw hrang hrangten ṭangkai taka an hman theih ka beisei," a ti.

Nodal officer training

Kumina MLA inthlanpui neih tur atana Kolasib district-a inthlan kaih­hnawih mawhphurtu nodal officer-te tan nimin khan DC conference hall-ah training buatsaih a ni a; district election officer John LT Sanga, bawrhsapin a hmanpui.